Bas prokýratýra úlestik qurylys týraly zańnamanyń talaptaryn túsindirdi

ASTANA. QazAqparat - Elorda ákimdiginde turǵyn úı qurylysyna úlestik qatysý týraly zańnamanyń qoldanylýyn túsindirýge baǵyttalǵan jınalyns ótti, dep habarlaıdy QR Bas prokýratýrasynyń baspasóz qyzmeti.

Atalǵan jıynǵa Astana qalasy ákiminiń birinshi orynbasary Sergeı Horoshýn, prokýratýra Departamentiniń aǵa prokýrory Rınat Atembekov, Investıtsııalar jáne damý mınıstrligi men «Turǵyn úı qurylysyna kepildik berý qory» AQ, sondaı-aq 200-ge jýyq qurylys kompanııalarynyń ókilderi qatysty.

Búginde ákimdik 23-ten asa obektilerde baspanalardy satý týraly zańsyz jarnamalardy anyqtap, osy faktilerdi quzyrly organdarǵa habarlady. Olar boıynsha materıaldar Іshki ister men Memlekettik kirister departamentterine  qajetti sharalardy qabyldaý úshin berildi.

Bas prokýratýranyń qyzmetkeri «Turǵyn úı qurylysyna úlestik qatysý týraly» Zańynyń talaptaryn buzbaý jóninde qurylys kompanııalary ókilderin aldyn ala eskertti.

«Turǵyn úı qurylysyna úlestik qatysý týraly» Zańynyń 3-baby 2-tarmaǵyna sáıkes turǵyn úılerdi (turǵyn ǵımarattardy) salý úshin jeke jáne zańdy tulǵalardyń aqshasyn Zańda belgilengen talaptardy buza otyryp tartýǵa tyıym salynady», - dedi jıyn barysynda Rınat Atembekov.

Sonymen qatar otyrysta«Turǵyn úı qurylysyna úlestik qatysý týraly» Zańynyń talaptaryn jan-jaqty túsindirildi jáne osy salada zańnamany buzý ákimshilik jáne qylmystyq  jaýaptylyqqa alyp keletindigi aıtyldy.