Bas prokýratýra terrorızmdi nasıhattaý men jalǵan habarlamalarǵa qatysty eskertý jasady
ASTANA. KAZINFORM — Eldiń qoldanystaǵy zańnamasynda terrorızmdi nasıhattaý jáne terrorızm aktisin jasaýǵa jarııa túrde shaqyrý úshin qylmystyq jaýaptylyq kózdelgen. Bul normalar qoǵamdyq qaýipsizdikti qorǵaýǵa, azamattardyń ómiri men densaýlyǵyna tónetin qaterlerdiń aldynalýǵa baǵyttalǵan.
Atap aıtqanda, QK-niń 256-babynyń sanktsııasy múlikti tárkileı otyryp, 5 jyldan 9 jylǵa deıin bas bostandyǵynan aıyrý jazasyn kózdeıdi. Al atalǵan áreketter buqaralyq aqparat quraldaryn, telekommýnıkatsııa jelilerin nemese onlaın-platformalardy paıdalaný arqyly jasalǵan jaǵdaıda jaýaptylyq edáýir qatańdatylady jáne 12 jylǵa deıin bas bostandyǵynan aıyrýǵa deıin jetýi múmkin. Sonymen qatar, qylmystyq jaýaptylyq tek tikeleı shaqyrýlarǵa ǵana emes, terrorızmdi qoldaýdyń ózge de nysandaryna qoldanylady.
Atap aıtqanda, jasalǵan terrorlyq aktini maquldaý nemese qoldaý, onyń ishinde áleýmettik jelilerdegi pikirler nemese ózge de jarııalanymdar túrinde bolsa da, terrorızmdi nasıhattaý retinde baǵalanady.
Osy rette Konstıtýtsııamen kepildik berilgen sóz bostandyǵy konstıtýtsııalyq qurylysty kúshpen ózgertýge, aýmaqtyq tutastyqty buzýǵa, memlekettiń qaýipsizdigine nuqsan keltirýge, soǵysqa, sondaı-aq qatygezdik pen zorlyq-zombylyq kýltin nasıhattaýǵa jol bermeıtinin atap ótken jón.
Sonymen birge, ınternette jáne áleýmettik jelilerde mektepterdiń, saýda ortalyqtarynyń, áýejaılardyń, vokzaldardyń jáne basqa da áleýmettik mańyzy bar nysandardyń «mınalanǵany» týraly kórineý jalǵan habarlamalar jıi taralady. Mundaı habarlamalar, ádette, rastalmaıdy, alaıda olardyń árqaısysy quqyq qorǵaý organdary tarapynan naqty qaýip retinde qabyldanyp, jedel áreket etýdi talap etedi. Mundaı áreketter úshin QK-niń 273-babynda terrorlyq akt jasalatyny týraly kórineý jalǵan habarlama bergeni úshin 5 jylǵa deıin bas bostandyǵynan aıyrýǵa deıingi qylmystyq jaýaptylyq kózdelgen. Alaıda, osyndaı qylmystardy jasaǵan tulǵalar ózderiniń anonımdi bolyp qalamyz dep qatelesip oılaıdy.
Tsıfrlandyrý men «aqyldy» sheshimderdiń damýy jaǵdaıynda quqyq buzýshynyń kim ekenin anyqtaý – tek ýaqyt máselesi.
Máselen, ótken jyly jalǵan terrorızm faktileri boıynsha 25 qylmystyq is sotqa joldanǵan.
Olardyń birinde 11-synyp oqýshysy ózge adamnyń atyn aıtyp, daýysyn ózgertip jáne IP-adresti almastyratyn baǵdarlamalardy qoldana otyryp, Jetisaı qalasyndaǵy mektepterdiń birinde jarylǵysh qurylǵy qoıylǵany týraly polıtsııaǵa habarlaǵan. Óziniń kim ekenin jasyrýǵa tyrysqanyna qaramastan, kámeletke tolmaǵan tulǵa anyqtalyp, 1 jylǵa bas bostandyǵyn shekteý jazasyna sottalǵan.
Taǵy bir jaǵdaıda Aqtaý qalasynyń turǵyny bilim berý mekemeleriniń birinde bomba bar ekeni týraly jalǵan habarlama jasaǵany úshin 1 jyl 6 aıǵa bas bostandyǵynan aıyrý jazasyna kesildi.
- Árbir osyndaı habarlama TJM, polıtsııa, UQK bólimsheleri men jedel járdem brıgadalarynyń qatysýymen aýqymdy tekserýler júrgizýge ákep soǵady. Oǵan jumsalǵan kúsh pen qarajat kináli tulǵalardan óndirip alynady. Bas prokýratýra azamattardy parasattylyqqa, alata-analardy balalardyń ınternettegi jáne áleýmettik jelilerdegi minez-qulqy men belsendiligine erekshe nazar aýdarýǵa shaqyrady. Tipti «ázil» retinde qabyldanǵan árekettiń ózi aýyr quqyqtyq saldarǵa ákelip, adamnyń taǵdyryn túbegeıli ózgertýi múmkin, - delingen habarlamada.
Osyǵan deıin Shymkent, Atyraý men Aqtóbe turǵyndary terrorızmdi nasıhattaǵany úshin sottalǵany týraly jazdyq.