Bas prokýratýra tergeý organdary joǵaltqan 3,5 myń qylmystyq iske qatysty pikir bildirdi

ASTANA. QazAqparat - 3,5 myń qylmystyq istiń joǵalýy týraly fakt shyndyqqa saı keledi. Bul týraly QR Bas prokýratýrasynyń baspasóz qyzmeti habarlaıdy.

«Sońǵy 3 jylda mundaı jaǵdaılardyń tirkelýine Almaty, OQO, Jambyl jáne Atyraý oblystarynyń tergeý organdary sebep bolyp otyr. Prokýratýra organdarynda bul qatarly kemshilikter joq. Qylmystyq quramy bolmaǵandyqtan, kináli adam tabylmaǵandyqtan toqtatylǵan aýyr emes jáne ortasha isterdi aıtyp turmyz. Aýyr jáne asa aýyr qylmystar boıynsha fakt joq. Barlyq ister boıynsha qajetti tergeý amaldary júrgizildi», - dep habarlaıdy Bas prokýratýradan.

Qazirgi tańda qylmystyq isterdiń basym bóligi qaıta qalpyna keltirilgen. Olaqtyq jibergenderdiń ústinen shara qabyldanǵan.

Qyzmetkerlerdiń olaqtyǵymen birge buzýshylyqtarǵa kóp jaǵdaıda quqyqqorǵaý organdarynyń ishindegi júıelilik kemshilikter sebep bolǵan.

Olqylyqtardy túzeý úshin Bas prokýratýranyń Quqyqtyq statıstıka komıteti «E-qylmystyq is» atty baǵdarlama ázirlegen. Bul úshin bıýdjetten qosymsha qarajat bólinbepti. Baǵdarlama qylmystyq isterdiń barlyq deńgeıin qamtıdy. Ol materıaldyq isterdiń jalǵan jasalýyn shektep, dálelderdi kóptep tartýǵa, protsessýaldyq qujattardy jasaýǵa serpin bermek. 15 tamyzdan bastap tyń joba Astana qalasy men Jambyl oblysynda júzege asyrylǵan. 15 qyrkúıekke deıin taǵy da 4 aımaqty qamtý josparlanyp otyr.