Bas prokýratýra tekserýler barysynda mektep oqýshylaryn sabaq ýaqytynda mal baǵyp, maqta jınaýǵa májbúrleý áreketterin anyqtady

Bul másele jóninde búgin jýrnalıstermen bolǵan brıfıngte Bas prokýratýranyń resmı ókili Nurdáýlet Súıindikov málim etti, dep habarlaıdy QazAqparat.

Onyń aıtýynsha, tekserý barysynda prokýrorlar balalardyń eńbek quqyqtary boıynsha halyqaralyq talaptardyń oryndalýyna basty nazarǵa alǵan. «Tekserýlar barysynda kóptegen zańbuzýshylyqtar anyqtaldy. Mysaly, jumys berýshiler balalardy jumysqa eńbek kelisiminsiz alyp, mindetti medıtsınalyq tekserý nátıjelerin nazardan tys qaldyrǵan. Sondaı-aq jasóspirimderdi túngi mezgilde jumysqa salyp, olardy zańdy ruqsat etilgen merzimnen kóp ýaqyt jumys istetkizgen. Buǵan qosa balalardy qaıyrshylyqpen aınalysýǵa májbúr etý áreketteri de tirkeldi», dedi resmı ókil.

Mysal retinde keltirilgen málimetterge qaraǵanda, Aqtóbe qalasynda N.Moldabaı, N.Rahıeva, E.Kravets atty kámeletke tolmaǵan jasóspirimder arnaıy eńbek kelisimi men medıtsınalyq tekserýlersiz «Artsah» dámhanasynda jumys istegen. «Al Balqash qalasynda ornalasqan «Berloga» dámhanasynda 17 jasar Brýskenko aptasyna 50 saǵattan astam ýaqyt jumys isteıtin bolǵan. Zań júzinde 16 men18 jas aralyǵyndaǵy jasóspirimderdi aptasyna 36 saǵattan astam jumysqa salýǵa bolmaıdy», dedi N.Súıindikov.

Onyń aıtýynsha, tekserý barysynda tipti kámeletke tolmaǵandardyń isimen aınalysatyn memlekettik mekeme ókilderiniń ózderi jasóspirimderdi zańnan tys jumysqa salý áreketteri anyqtaldy. Mysaly kásiptik bilim berý mektebiniń oqýshysy J.Januzaqovty polıtsııa ınspektory eki jylǵa jýyq jeke turǵyn úı qurylysynyń jumysyna salyp júrgen. Osy ýaqytta atalmysh áreket boıynsha qylmystyq is qozǵaý máselesi qaralýda. Sondaı-aq Qaraǵandy oblysynyń Osakarovka aýdanyna qarasty aýyldardyń birinde balalardy mal baǵý úshin mekteptegi oqýdan bosatqan. Al Ońtústik Qazaqstan oblysynyń Maqtaaral aýdanynda mektep oqýshylary sabaqqa barmaı maqta jınaýǵa qatysqan. «Qoryta aıtqanda, quzyrly organdar balalardyń eńbek etý quqyqtaryna baılanysty talaptardyń oryndalýyn qadaǵalamaıdy. Sondaı-aq olar tarapynan jumysty qajet etetin kámeletke tolmaǵan jasóspirimderdiń tizimi jasalmaıdy jáne olardyń jumyspen qamtylý jaǵdaıy da nazardan tys qalǵan», dedi N.Súıindikov.