Bas prokýratýra tekserý jumystarynyń barysynda sý qoımalaryn paıdalaný erejesin buzǵany úshin 17 is qozǵady
ASTANA. Sáýirdiń 22-si. QazAqparat /Aıdar Ospanalıev/ - Bas prokýratýra elimizdegi sý qoımalaryndaǵy qaýipsizdik sharalarynyń jaı-kúıine tekserý jumystaryn aıaqtady.
Atalmysh tekserýlerdiń nátıjesimen búgin jýrnalıstermen kezdesken Bas prokýratýranyń resmı ókili Nurdáýlet Súıindikov tanystyrdy, dep habarlaıdy QazAqparat.
Resmı ókildiń aıtýynsha, tekserý sharasy barysynda elimizdegi 400-ge jýyq sýmen baılanysty nysandar qamtylǵan. Olardyń kópshiligi belgilengen tártipti buzyp, qaýipsizdik sharalaryn saqtamaǵan. Kemshilikterdiń basym bóligi sýdyń deńgeıin baqylap otyratyn gıdrotirekter men sý ólshegish quraldardyń joqtyǵymen baılanysty. Sondaı-aq qoımalarǵa ýaqytynda tekserý júrgizilmegen. «Tekserý barysynda ıesiz sý qoımalary da tabyldy. Anyqtalǵan kemshilikter boıynsha prokýrorlar tarapynan 50 usynys jasalyp, 5 uıǵarym oryndaldy. Sý qoımalaryn paıdalaný erejelerin buzǵandary úshin ákimshilik quqyqbuzýshylyqpen baılanysty 17 is qozǵaldy. Barlyq ıesiz sý qoımalary quzyrly organdar tarapynan basshylyqqa alyndy. Bas prokýratýranyń tekserý jumystary boıynsha úkimetke arnaıy usynys ázirlenýde», dedi resmı ókil.
