Bas prokýratýra sottylyq týraly anyqtamany elektrondy túrde bere bastady
ASTANA. 17. naýryz. QazAqparat - QR Bas prokýratýrasy sottylyqtyń bolýy ne bolmaýy týraly anyqtamany elektrondy túrde bere bastady. Bul aqparatty atalǵan vedomstvo Quqyqtyq statıstıka jáne arnaıy esepke alý jónindegi komıtetiniń baspasóz qyzmeti taratty.
«Bas prokýratýranyń Quqyqtyq statıstıka jáne arnaıy esepke alý jónindegi komıtetiniń aýmaqtyq basqarmalary 2012 jyldyń 12 naýryzynan bastap halyqqa usynatyn qyzmetin ońtaıly aqparattyq qamtamasyz etý jáne sapasyn arttyrý maqsatynda «elektrondyq úkimet» veb-portaly arqyly, sondaı-aq Halyqqa qyzmet kórsetý ortalyqtary (HQKO) arqyly kelip túsken sottylyqtyń bolýy ne bolmaýy týraly elektrondy túrde anyqtamalar beredi. Bul rette, sottylyqtyń bolýy ne bolmaýy týraly anyqtamany berý merzimi 7-den 3 jumys kúnine deıin qysqartyldy», - delingen baspasóz habarlamasynda.
Azamat elektrondyq anyqtama alý úshin IIN jáne Ulttyq kýálik berýshi ortalyq bergen elektrondy sandyq qoltańba bolǵan jaǵdaıda «Elektrondyq úkimet» veb-portaly (EÚP) arqyly nemese jeke bas kýáligi men ótinishi bolǵan jaǵdaıda HQKO arqyly júgine alady.
2003 jylǵy 7 qańtardaǵy «Elektrondyq qujat jáne elektrondy sandyq qoltańba týraly» Zańnyń 7 baby 1-tarmaǵyna sáıkes sottylyqtyń bolýy nemese bolmaýy týraly elektrondyq anyqtamalar qaǵaz túrindegi anyqtamamen teń dárejede.
Sottylyqtyń bolýy nemese bolmaýy týraly elektrondyq anyqtamalardy berý halyqtan talap etiletin qujattardyń sanyn qysqartýǵa jáne azamattardyń osy memlekettik qyzmetti alý úshin ketetin ýaqyttaryn qysqartýǵa múmkindik beredi.
