Bas prokýratýra saılaý zańnamanyń talaptary saqtala otyryp ótkendigin málimdedi
ASTANA. 16 qańtar. QazAqparat /Rýslan Ǵabbasov/ - Elektoraldyq kampanııa men daýys berý qalypty jaǵdaıda ótti.
Bul týraly búgin Astanada ótken brıfıngte QR Bas prokýratýranyń resmı ókili Nurdáýlet Súıindikov málim etti.
Azamattardan daýys berýge qatysý quqyǵyn iske asyrýda kedergi jasalǵany týraly ótinishter men shaǵymdar túspegenine toqtalǵan resmı ókil: «Elektoraldyq kezeńdegi qadaǵalaý qyzmetiniń nátıjeleri Parlament Májilisi men máslıhattardyń depýtattaryn saılaý Qazaqstan Respýblıkasynyń Konstıtýtsııasy men «Qazaqstan Respýblıkasyndaǵy saılaý týraly» Konstıtýtsııalyq zańynyń talaptary saqtala otyryp ótkendigin atap kórsetýge múmkindik beredi»,-dedi.
N. Súıindikovtyń atap ótýinshe, árbir zańbuzýshylyq týraly habarlama muqııat tekserilip, olar rastalǵan jaǵdaıda buzylǵan quqyqtardy qalpyna keltirip, kináli adamdardy zańmen belgilengen jaýapkershilikke tartýǵa baǵyttalǵan sharalar qoldanyldy. Zańnamanyń keıbir talaptarynyń buzylýy jekelegen jaǵdaılarda oryn alǵan jáne olar daýys berý qorytyndylaryna áserin tıgizgen joq.
«Azamattardyń saılaý quqyqtaryn óreskel buzý faktileri anyqtalǵan joq»,-dep túıindedi ol.
