Bas prokýratýra saılaý qarsańynda qazaqstandyqtarǵa zań talaptaryn eske saldy
ASTANA. KAZINFORM — QR Bas prokýratýrasy 2026 jylǵy 23 tamyzǵa taǵaıyndalǵan Qazaqstan Respýblıkasy Quryltaıy depýtattarynyń saılaýyna baılanysty azamattarǵa úndeý jarııalap, saılaý naýqany kezinde zań talaptaryn qatań saqtaýǵa shaqyrdy.
Qazaqstan Respýblıkasy Bas prokýrorynyń orynbasary E. Ótegenovtiń málimetinshe, Ortalyq saılaý komıssııasy bekitken kúntizbelik josparǵa sáıkes, partııalyq tizimderdi usyný jáne tirkeý kezeńi 2-23 shilde aralyǵynda ótedi. Al saılaýaldy úgit-nasıhat jumystary 23 shilde kúni saǵat 18:01–de bastalyp, 22 tamyz kúni saǵat 00:00–de aıaqtalady.
Ol partııalyq tizimderdi tirkeý merzimi aıaqtalǵanǵa deıin kez kelgen saılaýaldy úgit júrgizýge zańmen tyıym salynǵanyn eske saldy. Bul talapty buzǵandar Ákimshilik quqyq buzýshylyq týraly kodekstiń 102-babyna sáıkes jaýapkershilikke tartylady.
— Sondaı-aq saılaýshylarǵa taýar taratý, aqsha berý nemese ýáde etý, jeńildikter usyný, qaıyrymdylyq aktsııalaryn ótkizý jáne lotereıa uıymdastyrý sekildi jónsiz úgit túrlerine de jol berilmeıdi. Mundaı áreketter úshin ákimshilik, al saılaýshylardy satyp alý belgileri anyqtalǵan jaǵdaıda qylmystyq jaýapkershilik qarastyrylǵan, — dedi Bas prokýrordyń orynbasary.
Bas prokýratýra saılaý jarııalanǵan sátten bastap kandıdattar men saıası partııalarǵa, sondaı-aq olardy qoldaıtyn tulǵalarǵa oıyn-saýyq jáne sporttyq is-sharalardy qospaǵanda, qaıyrymdylyq sharalaryn ótkizýge tyıym salynatynyn atap ótti. Bul talaptardyń buzylýy kandıdattyń nemese partııalyq tizimniń tirkeýiniń kúshin joıýǵa negiz bolýy múmkin.
Sonymen qatar buqaralyq aqparat quraldary men onlaın-platformalar kandıdattardyń nemese saıası partııalardyń ar-namysy men iskerlik bedeline nuqsan keltiretin jalǵan aqparatty jarııalaýdan bas tartýǵa mindetti. Kórineý jalǵan málimetterdi taratý úshin ákimshilik jáne qylmystyq jaýapkershilik kózdelgen.
Bas prokýratýra qoǵamdyq pikirge saýal salý nátıjelerin jarııalaýdyń da zańmen retteletinin eske saldy. Mundaı zertteýlerdi tek arnaıy talaptarǵa saı keletin zańdy tulǵalar ǵana júrgize alady. Al daýys berý kúni men oǵan deıingi bes kún ishinde saýalnama nátıjelerin jarııalaýǵa tyıym salynady.
Vedomstvo barlyq saılaý protsesine qatysýshylardy zańdylyqty saqtaýǵa, quqyq buzýshylyqtarǵa jol bermeýge jáne qoǵamdyq tártipti qamtamasyz etýge shaqyrdy.
Eske salsaq, Memleket basshysy «Qazaqstan Respýblıkasy Quryltaıynyń saılaýyn taǵaıyndaý týraly» Jarlyqqa qol qoıyp, saılaý 23 tamyzǵa belgilendi.
Búgin Jalpyulttyq sotsıal-demokratııalyq partııasy Quryltaı depýtattyǵyna 33 kandıdatty bekitkeni belgili boldy.
