Bas prokýratýra saılaý barysy týraly: Úsh oblysta 9 zańbuzýshylyq tirkeldi
ASTANA. QazAqparat – Daýys berý protsesi bastalǵannan beri úsh oblysta 9 zań buzý faktisi resmı tirkelgen. Bul týraly Bas prokýratýra ókili Azamat Sarǵazın Qazaqstan telearnasy ótkizip jatqan onlaın telemarafonda aıtty, dep habarlaıdy QazAqparat tilshisi.
«Júrgizilip jatqan monıtorıng nátıjesinde dál osy ýaqytta saılaý týraly zańnamany buzýdyń 9 faktisi tirkeldi. Olar Almaty oblysynda Eńbekshi qazaq, Jambyl, Raıymbek jáne Uıǵyr aýdandaryndaǵy saılaý ýchaskelerinde; Jetisý oblysynda Qaratal jáne Kerbulaq aýdandaryndaǵy ýchaskelerde; Soltústik Qazaqstan oblysynyń Aıyrtaý jáne Jambyl aýdandaryndaǵy ýchaskelerde bolǵan.
Bul zańbuzýshylyqtar komıssııa músheleri tarapynan azamattarǵa basqa adamdar úshin daýys berýge múmkindik berýmen baılanysty», - dedi Bas prokýratýra ókili.
