Bas prokýratýra respýblıkalyq referendým aıasynda mıtıng ótkizýdiń tártibin túsindirdi
«Referendým aldynda úgit júrgizý maqsatymen jınalystar men mıtıngiler ótkizý tártibi 2020 jylǵy 25 mamyrda qabyldanǵan «Beıbit jınalystardy ótkizý jáne uıymdastyrý tártibi týraly» Zańmen retteledi. Sáıkesinshe, azamattar men qoǵamdyq birlestikterdiń osy sıpattaǵy jınalystar men mıtıngiler ótkizý nıeti bolsa, habarlama jasaý tártibi qarastyrylǵan. Olardy ótkizý týraly habarlama ákimdikke belgilengen kúnge 5 jumys kúni qalǵalǵa deıin keshiktirilmeı jazbasha berilýi tıis.
Ondaı beıbit jınalystyń maqsaty men nysany, uıymdastyrýshylar men qoǵamdyq tártipti saqtaýǵa jaýapty adamdardyń derekteri kórsetiledi. Ákimdik habarlamany tirkegen kúnnen bastap 3 jumys kúni ishinde qaraýǵa tıis. Osy 3 kún ótkennen keıin ákimdik tarapynan jaýap bolmaǵan jaǵdaıda uıymdastyrýshy berilgen habarlama boıynsha jınalys ótkizýge quqyly», - dedi Bas prokýrordyń aǵa kómekshisi.
Sondaı-aq, ol atalǵan habarlamany qaraý nemese jergilikti atqarýshy organnyń sheshimin alý merzimderi ótkennen keıin ǵana osyndaı is sharalarǵa qatysýǵa úgitteýge bolatynyn eske saldy. Bas prokýratýra ókili referendým kezinde beıbit jıyndar ótkizýdiń talabyn buzǵandarǵa qandaı jaza qoldanylatynyna toqtaldy.
«Eger osy talaptar saqtalmaı, jmnalys nemese mıtıngiler jergilikti ákimdikke tıisti habarlama berilmesten uıymdastyrylyp, ótkizilse, uıymdastyrýshylar da, qatysýshylar da ákimshilik jaýapqa tartylýy múmkin. Mundaı áreketter úshin ákimshilik quqyq buzý týraly kodekstiń 488-baby boıynsha, eskertý, aıyppul jáne qamaý túrinde jaza kózdelgen.
Jergilikti atqarýshy organ jınalysty nemese mıtıngini ótkizýdi kelisýden resmı túrde bas tartqan jaǵdaıda da olardy ótkizýge tyıym salynady jáne ákimshilik jaýaptylyqqa ákep soqtyrady. Eger bul áreketter azamattardyń, uıymdardyń, qoǵamnyń nemese memleketterdiń quqyqtary men zańdy múddelerine eleýli zııan keltirýmen qatar júrse, Qylmystyq kodekstiń 400-baby boıynsha qylmystyq jaýaptylyq týyndaıdy. Ol 200 AEK-ke deıingi mólsherde aıyppul nemese 200 saǵatqa qoǵamdyq jumystarǵa tartý, ne 50 táýlikke deıingi merzimge qamaý túrinde jazany kózdeıdi», - dedi Azamat Sarǵazın.
Búgingi Úkimet otyrysynda QR Premer-Mınıstriniń orynbasary – Qarjy mınıstri Erulan Jamaýbaev konstıtýtsııalyq reformaǵa qatysty ótetin respýblıkalyq referendým ótkizýge qansha qarajat bólingenin aıtty.
