Bas prokýratýra respýblıkalyq qurylys nysandarynyń qunyn negizsiz qymbattatý faktilerin anyqtady
ASTANA. 7 sáýir. QazAqparat /Jasulan Amanbaıuly/ - Elde respýblıkalyq bıýdjet qarjysyna salynyp jatqan qurylys nysandarynyń quny negizsiz joǵarylatylyp kelgen.
Buny bıýdjet qarajatyn paıdalaný kezinde qurylys nysandarynyń qunyn qymbattatý sebepterine qatysty jasalǵan Bas prokýratýranyń taldaýy kórsetip otyr.
Búgin jýrnalıstermen bolǵan kezdesýde Bas prokýratýranyń resmı ókili Jandos Ómirálıevtiń atap ótkenindeı, 2009 jyly respýblıkalyq bıýdjetten qarjylandyrylatyn 35 jobanyń qurylys quny 20 mlrd. teńgege negizsiz qymbattaǵan. 2010 jyly osyndaı jemqorlyq faktileri qaıtalanyp, memleketke 19 mlrd. astam teńge zalal keltirilgen.
«Mysaly, jobalaý-smetalyq qujattamanyń sapasyz ázirlenýine jáne memlekettik saraptama úderisindegi kemshilikterge baılanysty Astana qalasyndaǵy onkologııalyq dıspanserdiń jobasy eki márte túzetilgen. Nátıjesinde onyń smetalyq quny 2,8 mıllıardtan 7,4 mıllıard teńgege deıin ósip ketken. Nemese 2,5 esege artqan»,-dedi J. Ómirálıev.
Bas prokýratýranyń málimetteri boıynsha, qurylys merzimderin negizsiz uzartý faktileri de nysandardyń qymbattaýyna ákep soqqan.
Vedomstvo anyqtaǵanyndaı, Almaty qalasyndaǵy perınataldyq ortalyqtyń qurylys merzimin merdiger sozyp alýyna baılanysty, onyń jobalaý-smetalyq qujattamasy 2008 jyldan beri úsh ret qaıta eseptelgen. «Sońǵy qaıta esepteýden keıin nysannyń quny qosymsha 1,6 mlrd. teńgege ósken»,-deıdi J. Ómirálıev.
