Bas prokýratýra Nyǵmatýlınderge qatysty tergeýge túsinikteme berdi
ASTANA. KAZINFORM – Bas prokýrordyń orynbasary Ǵalymjan Qoıgeldıev Nyǵmatýlınderge qatysty istiń qaı kezeńde júrip jatqanyn aıtty.
- Arǵyn Nyǵmatýlınge qatysty izdeý jarııalandy, ıaǵnı Qaraǵandy oblysynda hokkeı klýbyna bólingen qarajatty jymqyrý deregi boıynsha is qozǵaldy, - dedi Ǵ. Qoıgeldıev Parlament Májilisinde tilshiler suraǵyna jaýap bere otyryp.
Sonymen qatar ol Erlan Nyǵmatýlınge qatysty is tergelip jatqanyn aıtty.
- Al Nurjan Nurlanovqa qatysty is te tergelip jatyr. Qazir quqyqtyq kómek jónindegi suraýdy Túrkııaǵa joldadyq. Atalǵan ister tergeý satysynda, - dedi Bas prokýrordyń orynbasary.
Eske salaıyq, 2025 jyly 3 naýryzda elimizdiń prokýratýra organdary burynǵy Májilis spıkeri Nurlan Nyǵmatýlınniń aǵasy Arǵyn Nyǵmatýlınge izdeý jarııalady.
Byltyr sáýir aıynda Bas prokýrordyń orynbasary Ǵalymjan Qoıgeldıev Nurjan Nurlanuly men Erlan Zaırollaulyna qatysty shaǵym túskenin aıtqan edi.