Bas prokýratýra mindetti vaktsınatsııalaýǵa qatysty túsinik berdi
«Jalpy, zań jobasyna kóp kúsh salyndy, biraz sharýalar jasaldy, qoǵamǵa qajetti biraz nárseler qaraılastyryldy. Biraq, 89 baptyń kóleminde qoǵam dúrgilip jatqanyn jasyrmaımyz. Men saılaýshylardyń amanatyn jetkize otyryp, osy 89 bapqa qarsy shyǵatynymdy jetkizgim keledi. Jumsaq kúsh, ılandyra túsindirý ádisimen kóndirýdiń ornyna, bas kóz joq «mindetti» dep, zańǵa qondyryp, tizege salýdyń qandaı reti bar? Jalpy, osy vaktsınaǵa qarsy emespin. Balalaryma saldyramyn, ózim de kezinde vaktsına alǵanmyn. Biraq, kózi ashyq esi durys adamǵa túsindirse, túsinetin nárse ǵoı. Nege biz zańmen mindetteımiz? Bas prokýratýradan suraıtynym, bas tartqan adam is júzinde zań buzýshy bolyp shyǵa kele me? Konstıtýtsııanyń 29 babynda bar ǵoı, soǵan bul qaıshy kelmeı me? Ár adam óziniń densaýlyǵyn qorǵaýǵa quqyǵy bar. Maǵan túsindirińizdershi? Nege biz mindetteýimiz kerek?!», - dep surady depýtat Bekbolat Tileýhan.
Óz kezeginde Densaýlyq saqtaý mınıstri Eljan Birtanov vaktsınatsııany mindetti túrde engizý qadamy ınfektsııalyq aýrýlar boıynsha basqa azamattardyń densaýlyǵyn saqtaýǵa negizdelgenin aıtty.
«Sebebi qazirgi kúnde osy ata-analardyń ekpeden bas tartýynyń saldarynan jalpy elimizde burynnan umytylǵan ınfektsııalyq aýrýlar qaıtyp kelip jatyr. Biraq odan tek qana sol balalar emes, basqa da kóptegen medıtsınalyq aýrýlarǵa shaldyqqan balalar syrqattanýda. Sonymen, kóp memlekette keıbir vaktsınalar mindetti túrde salynady. Atap aıtqanda, basqa azamattardyń densaýlyǵyn saqtaý - ol Úkimettiń mindeti» - dedi mınıstr.
Sonymen qatar bul máselege qatysty Bas prokýrordyń orynbasary Marat Ahmetjanov ta túsinik berdi.
«Bekbolat Qanaıuly, bizdiń Konstıtýtsııamyz eki baptan turady, jalpy bap pen arnaıy bap. Bizdiń qundylyqtarymyz adam, adamnyń ómiri, adamnyń densaýlyǵy dep bizdiń negizgi zańymyzda kórsetilgen. Sondyqtan, Konstıtýtsııanyń jalpy bólimi arnaıy bólimnen bir saty joǵary turady. Eger adamnyń ómirine, densaýlyǵyna qaýip tónse, bizdiń Konstıtýtsııa sol jerde zańmen shekteý jasaýǵa tolyq múmkindik berip otyr. Osy oraıda Konstıtýtsııaǵa qaıshy emes. Óıtkeni, adamnyń ómiri eń qundy dep esepteledi. Bizdiń saraptamamyz boıynsha Konstıtýtsııaǵa bul normalar qaıshy kelmeıdi», - dedi M. Ahmetjanov.
Aıta keteıik, atalǵan zań jobasy boıynsha qosymsha baıandama jasaǵan depýtat Záýresh Amanjolova ınfektsııalyq aýrýlarǵa qarsy vaktsınatsııa júrgizýdiń mindettiligi boıynsha norma qoldaý tapqanyn jetkizdi.
«Bul rette ekpeler mindetti jáne erikti bolyp aıqyndaldy. Sonymen qatar, vaktsınanyń sapasyna qatań baqylaý normasy engizildi. Kez kelgen ýaqytta tekserýge múmkindik berilip, tekserýlerdiń arnaıy tizimine engizildi. Óndirýshiden bastap medıtsına qyzmetkerlerine deıingi barlyq kezeńderde jaýapkershilik aıtarlyqtaı kúsheıtiledi», - dedi Z. Amanjolova.