Bas prokýratýra menıngıtke qatysty taraǵan aqparattardy tekserip jatyr

ASTANA. QazAqparat - QR Bas prokýratýrasy WhatsApp messendjeri arqyly menıngıtke qatysty tarap jatqan habarlardy tekserip jatyr. Bul týraly Ortalyq kommýnıkatsııalar qyzmetinde QR Densaýlyq saqtaý mınıstri Eljan Birtanov málim etti, dep habarlaıdy QazAqparat.

«Bas prokýratýra tergeý sharalaryn bastady. Eger de zańnamany buzý faktileri anyqtalsa, onyń ishinde aqparattyq habarlamalar boıynsha zańsyzdyqtar bolsa, onda bul adamdar jaýapqa tartylýy tıis dep oılaımyn. Sebebi halyq arasynda dúrbeleń týdyrmas úshin, tıisti sharalar qabyldaý kerek», - dedi mınıstr.

Vedomstvo basshysy osy oraıda resmı aqparat kózderine nazar aýdarýǵa shaqyrdy.

«Densaýlyq saqtaý mınıstrligi barlyq qajetti jumystardy júrgizip jatyr, sáıkesinshe tıisti aqparattardy usyndy. Dúrligýge eshqandaı negiz joq», - dep túıdi Eljan Birtanov.

Budan buryn habarlanǵandaı, jyl basynan beri Qazaqstanda menıngıt ınfektsııasyn juqtyrǵan 58 naýqas tirkeldi. Olardyń 18-i 14 jasqa deıingi balalar. Bıyldan bastap atalǵan dertten 12 adam kóz jumdy.

Sonymen qatar QR Densaýlyq saqtaý mınıstri Eljan Birtanov menıngıtke qarsy vaktsınalaý jumystarynyń nege júrgizilmeıtinin túsindirdi.

Mınıstr menıngıtke shaldyqqan jaǵdaıda ózdiginen em qoldanbaýǵa shaqyrdy.