Bas prokýratýra Memleket basshysynyń eldegi zańdylyq pen ádilettilikti kúsheıtý jónindegi tapsyrmalaryn dáıektilikpen júzege asyrýda - A.Daýylbaev
Bul týraly Bas prokýror Ashat Daýylbaev KTK telearnasynyń «Halyq qyzmetshisi» baǵdarlamasynda Artýr Platonovqa bergen suhbatynda málim etti.
«Osy jylǵy 20 qańtarda Memleket basshysy Nursultan Nazarbaev quqyq qorǵaý organdary basshylarymen ótkizgen keńesinde prokýratýra organdarynyń jumysyn da ádil synǵa alyp, tıisti tapsyrmalar júktegen bolatyn, - dedi A.Daýylbaev. - Biz óz qyzmetimizdiń basty maqsaty zańdylyq pen ádilettilikti qamtamasyz etý, azamattardyń bostandyqtary men quqyqtaryn qorǵaý dep bilemiz. Sondyqtan da biz óz jumysymyzdyń neǵurlym buqaraǵa ashyq bolýyn maqsat etip qoıyp otyrmyz. Prokýratýra organdaryna kúnine birneshe júzdegen adam ádilettilik izdep, ózderiniń quqyqtaryn qorǵaý úshin júginedi. Meniń ózim kúnine 20-50 adamdy qabyldaımyn».
Ol sonymen qatar Bas prokýratýra janynan Parlament depýtattarynyń, azamattyq qoǵam uıymdarynyń, buqaralyq aqparat quraldary ókilderiniń qatysýymen Qoǵamdyq keńes qurylǵanyn atap ótti. Osyndaı qurylymdar barlyq prokýratýra organdary janynda jumys isteıdi. Ótken jyldyń ózinde 140 myńǵa tarta azamattyń eńbekaqy jóninde 8 mlrd.teńgeden astam talabyn qanaǵattandyryp, eńbekaqy qarajattary óndirilip berildi. Bas prokýrordyń blogynda kez kelgen azamat ózderiniń suraqtaryn qoıa alady. Olardyń birde bir talap-shaǵymy eskerýsiz qalmaıdy. Sondaı-aq táýlik boıy jumys isteıtin Call-ortalyqqa 115 nómiri boıynsha baılanysqa shyǵýǵa bolady.
«Sondaı-aq biz óziniń qyzmetine jaýap qaraıtyn qyzmetkerlerimizdi tıisti tártipke salyp otyramyz. Quqyq qorǵaý organdaryn attestattaý nátıjesinde óz jumysyn tıisti atqara dárejede almaıtyn qyzmetkerlerimizdiń 10 paıyzymen qoshtastyq», dedi Bas prokýror.
