Bas prokýratýra Mańǵystaý azamattaryn arańdatýshylyq maqsattaǵy aqparattarǵa nazar aýdarmaýǵa shaqyrdy
ASTANA. 20 jeltoqsan. QazAqparat /Rýslan Ǵabbasov/ - Jańaózende tótenshe jaǵdaı rejımi kezinde quqyqtyq tártip organdary tarapynan birde-bir qarý paıdalaný faktisine jol berilgen joq.
«Degenmen, bizdiń birneshe ret qaıtalanǵan, tekserilmegen aqparatty jarııalaýdan bas tartý jónindegi shaqyrýymyzǵa qaramastan, naqty málimettermen jáne memlekettik organdardyń resmı habarlarymen qýattalmaǵan ár túrli aqparattardy jarııalaý jalǵasýda»,- dep eskerip ótti resmı ókil. Onyń sózine qaraǵanda, máselen, keshe buqaralyq aqparat quraldary Jańaózen qalasyndaǵy tártipsizdik saldarynan Ingýshetııanyń Janbolat Tangıev atty azamaty mert bolǵany týraly habarlaǵan. «Alaıda, júrgizilgen tekserý barysynda J.Tangıevtyń aman-saý jáne Aqtaý qalasynda ekendigi belgili boldy. Ol Jańaózen qalasyndaǵy jappaı tártipsizdikterge qatyspaǵandyǵyn habarlady», dedi N.Súıindikov. Osyǵan baılanysty resmı ókil Mańǵystaý oblysynyń azamattaryn zańdylyq pen quqyqtyq tártipti saqtaýǵa jáne arańdatýshylyq maqsattaǵy aqparattarǵa nazar aýdarmaýǵa shaqyrdy. «BAQ ókilderin bolǵan oqıǵalardy jaryqqa shyǵarý jumystaryna jaýaptylyqpen qarap, halyq arasynda negizsiz úreı týdyratyn, shyndyqqa saı kelmeıtin aqparatty jarııalaýǵa jol bermeı, tek tekserilgen faktilerge súıenýdi suraımyz"- dep túıindedi sózin N.Súıindikov.
