Bas prokýratýra qyzmetkerleri ózin-ózi órtegen áıelge qan tapsyrmaq

ASTANA. QazAqparat - QR Bas prokýratýrasynyń qyzmetkerleri qadaǵalaýshy organnyń elordadaǵy bas ǵımaraty aldynda ózin-ózi órtep jibergen áıelge qan tapsyrmaq. Bul jaıynda QazAqparat tilshisine QR Bas prokýratýrasy apparaty basshysynyń orynbasary Nurdildá Oraz málim etti.

«Dárigerler Maıra Rysmanovanyń jaǵdaıyn turaqty aýyr dep baǵalap otyr. Týǵan-týystary men dárigerlerdiń aıtýynsha, oǵan qan quıý qajet. Osyǵan oraı  Bas prokýratýra men Astana qalasynda ornalasqan prokýratýra organdarynyń qyzmetkerleri qan tapsyryp, qol ushyn sozyp jatyr. Shamamen 60 adamnan donorlyq qan qajet», - dedi Nurdildá Oraz.

Aıta keteıik, aǵymdaǵy jyldyń 6 jeltoqsany kúni kúndizgi saǵat 12-16-da QR Bas prokýratýrasynyń baqylaý-ótkizý pýnktinde 1968 jyly dúnıege kelgen Maıra Rysmanova ózin-ózi órtep, qalalyq aýrýhanaǵa jetkizilgen bolatyn. Ol mundaı qadamǵa uly E.Ahmetovtiń sottalýyna kelispegendikten barǵan edi. Onyń uly Shý aýdandyq sotynyń úkimimen zańsyz esirtki zattaryn satqany úshin 4 jyl 6 aıǵa sottalǵan.