Bas prokýratýra Quryltaı saılaýyndaǵy zań buzý týraly derekterdi jarııalady
ASTANA. KAZINFORM — Saılaýdy uıymdastyrý men ótkizýdiń búkil kezeńinde ákimshilik quqyq buzýshylyqtyń nebári 2 quramy boıynsha 15 buzýshylyq anyqtaldy.
Elde júrgizilip jatqan konstıtýtsııalyq reforma aıasynda prokýratýra organdary ótken Quryltaı depýtattary tarıhı saılaýynyń barlyq kezeńinde zańdylyqtyń saqtalýyna joǵary qadaǵalaýdy qamtamasyz etti.
Saılaý naýqanyn jalpy alǵanda, kandıdattardy usyný jáne partııalyq tizimderdi tirkeý, úgit júrgizý jáne daýys berý protsesterin qosa alǵanda, quqyqtyq alańda, tilektestik pen tynyshtyq jaǵdaıynda ótti.
Saılaý komıssııalary tarapynan buzýshylyqtar, bıýlletenderdi zańsyz berý, basqa adamdar úshin daýys berý jáne bıýlletenderdi tastaý faktileri bolǵan joq.
Sondaı-aq akkredıttelgen baıqaýshylarmen jáne BAQ ókilderimen janjaldar, olardy saılaý ýchaskelerinen shyǵaryp jiberý faktileri jáne qoǵamdyq tártiptiń ózge de óreskel buzýshylyqtary tirkelgen joq.
— Saılaýdy uıymdastyrý men ótkizýdiń búkil kezeńinde ákimshilik quqyq buzýshylyqtyń nebári 2 quramy boıynsha 15 buzýshylyq anyqtaldy. Atap aıtqanda, bul — 3 zańsyz saýal salý faktisi jáne 12 fakt — oǵan tyıym salý kezeńinde úgit júrgizý.
Salystyrý úshin, 2023 jylǵy saılaýda ákimshilik quqyq buzýshylyqtyń 8 quramy boıynsha saılaý zańnamasyn buzýdyń 69 faktisi boldy.
2026 jyldyń osy elektoraldyq kezeńinde prokýrorlar barlyǵy 12 ótinishti qarady. Olardyń árqaısysy boıynsha túsindirme sıpatyndaǵy jaýaptar berildi. Barlyq ótinish partııalyq tizimderdi tirkeý jáne úgit júrgizý máselelerine qatysty boldy, — delingen Bas prokýratýra habarlamasynda.
Quqyqtyq ahýal 2023 jylǵy naýryzdaótken Parlament Májilisi depýtattarynyń saılaýynda múlde ózgeshe boldy.
Sol kezde prokýratýra organdary 113 ótinish pen shaǵymdy qarady, ıaǵnı bıylǵydan 9 ese kóp.
2023 jylǵy saılaý naýqany kezeńinde Parlament Májilisiniń depýtattyǵyna kandıdattar sot organdaryna 82 talap aryz berdi, al bıyl, partııalyq tizimderge engizilgen kandıdattar sottarǵa júgingen joq.
Keltirilgen derekter ýákiletti organdar men prokýratýranyń «Zań jáne tártip» konstıtýtsııalyq qaǵıdaty sheńberinde júrgizgen aýqymdy túsindirý jáne profılaktıkalyq jumysynyń tıimdiligin rastap qana qoımaı, saılaý protsesine qatysýshylardyń quqyqtyq mádenıetiniń sapalyq turǵydan artqanyn da aıqyn kórsetedi.
Aıta ketelik Quryltaı saılaýyna 9,3 mln adam qatysqany týraly jazǵan edik.
