Bas prokýratýra kúdiktini ustaý ýaqytyn 72-den 48 saǵatqa deıin qysqartýdy usyndy
ASTANA. QazAqparat - Búgin Parlament Májilisinde QR Bas prokýrorynyń orynbasary Marat Ahmetjanov adamdy ustaý ýaqytyn 72-den 48 saǵatqa deıin qysqartý usynysyn túsindirdi, dep habarlaıdy QazAqparat.
«Kúdiktini sanktsııasyz ustaý ýaqytyna toqtalsaq, Konstıtýtsııa onyń joǵary shegin bekitken. Ózderińiz bilesizder, ol 72 saǵat. Ony biz 48 saǵatqa deıin qysqartýǵa usynys jasap otyrmyz. Al kámeletke tolmaǵandar úshin 24 saǵatqa deıin qysqartý qarastyrylǵan. Mundaı usynys neden týyp otyr deısizder ǵoı? Eń bastysy bul - adamnyń quqy. Árıne, 48 saǵat - ol halyqaralyq standart. Barlyq damyǵan elderde osy merzim kórsetilgen. Bizde de oǵan umtylýymyz kerek», - dedi M. Ahmetjanov «Qazaqstan Respýblıkasynyń keıbir zańnamalyq aktilerine quqyqtyq qorǵaý qyzmetiniń protsestik negizderin jańǵyrtý máseleleri boıynsha ózgerister men tolyqtyrýlar engizý týraly» zań jobasyn tanystyrý barysynda.
Onyń sózine qaraǵanda, prokýrorlardyń saraptamasyna sáıkes, naǵyz shaǵymdar men aryzdar, zań buzýshylyq, adam quqyn qorǵaýǵa kedergi jasaǵan másele adamdy ustaý kezeńine qatysty bolyp otyr.
«Sondyqtan osy jerde olardy qınap, jaýap alyp moıyndatýǵa jáne basqa da áreketter bolýy múmkin. Osy salany odan ári jetildirip, merzimin qysqartyp, prokýratýra qadaǵalaýyn kúsheıtý talaby qoıylyp otyr. Biraq 72 saǵat merzimi mynandaı kúrdeli ister úshin qalady: birinshiden, ol asa aýyr qylmystar, terrorızm nemese ekstremızm, jappaı tártipsizdik, qylmystyq toptarmen qylmys jasalsa, zańsyz esirtki aınalymy, kámeletke tolmaǵandarǵa qarsy jynystyq qylmystar, adam ólimine ákelgen qasaqana is-áreketter boıynsha. Sonymen qatar jer shalǵaı bolǵanda nemese tótenshe jaǵdaılarda adamdy ýaqytynda sotqa jetkizý múmkindigi bolmasa», - dep túsindirdi Marat Ahmetjanov.
