Bas prokýratýra Qojamjarov, Keksel, Tatýbaev isteri jóninde aıtyp berdi

ASTANA. KAZINFORM — Bas prokýrordyń orynbasary Ǵalymjan Qoıgeldıev Májiliste Qaırat Qojamjarov, Olesıa Keksel jáne Talǵat Tatýbaevqa qatysty tergeý jóninde tilshiler suraǵyna jaýap berdi.

Onyń aıtýynsha, Ekonomıkalyq jáne sybaılas jemqorlyq qylmystaryna qarsy kúres agenttiginiń (qarjy polıtsııasynyń) burynǵy tóraǵasy Qaırat Qojamjarovqa qatysty qylmystyq is qozǵalǵan.

— Qylmystyq is qozǵaldy, sotqa deıingi tergep-tekserý bastaldy, qazirgi ýaqytta dáleldemelik baza jınaqtalyp jatyr. Qalǵanynyń bári protsesste jarııa etiledi, — dedi ol.

Qaırat Qojamjarovtyń naqty qaıda ekendigi týraly suraqqa spıker tergeý múddelerin alǵa tartyp, pikir bildirýden bas tartty.

Sonymen birge, bas prokýror orynbasarynyń habarlaýynsha, Sybaılas jemqorlyqqa qarsy is-qımyl ulttyq bıýrosynyń burynǵy basshysy Talǵat Tatýbaev pen Bas prokýratýranyń arnaıy prokýrorlar qyzmetiniń eks-bastyǵy Olesıa Kekselge qatysty jeke qylmystyq ister qozǵalǵan.

— Bul ártúrli ister, biraq azaptaý faktileri boıynsha uqsas. Tatýbaev qamaýǵa alyndy. Al Kekseldiń jas sábıi bar, sondyqtan onyń statýsy anyqtalyp jatyr, — dep túsindirdi ol. 

Aıta keteıik, qyrkúıek aıynyń basynda Qaırat Qojamjarovqa qatysty sotqa deıingi tergeý bastaldy. Ol laýazymdyq ókilettigin asyra paıdalandy jáne ártúrli kezeńde qylmystyq jolmen alynǵan aqshany zańdastyrdy degen kúdikke ilindi.