Bas prokýratýra Qostanaı oblysyndaǵy órtke baılanysty 3 qylmystyq is qozǵady
«Qostanaı oblysynyń Áýlıekól, Uzynkól jáne Qarabalyq aýdandarynda tabıǵı órtti sóndirý jalǵasýda.
Tórt eldi mekende (Amanqaraǵaı aýyly, Ozernoe, Kalının jáne Lesnoe) aldyn ala málimetter boıynsha 108-ge jýyq turǵyn úı men ǵımarat zardap shekti. Keltirilgen zalal mólsheri anyqtalýda.
Búginde Amanqaraǵaı aýylynyń turǵyny - 1936 jyly týǵan M.I. Babenkonyń qaza tapqany belgili.
Sonymen qatar, 3 qyrkúıekte Qostanaı qalasynda «Orýjeınaıa palata» ańshylyq dúkeni órtengen. Sonyń saldarynan dúkenniń jeti qyzmetkeri zardap shegip, úsheýi kúıik shalyp aýrýhanaǵa jatqyzyldy, al tórteýi qaza tapty», - dep jazylǵan Bas prokýratýranyń baspasóz qyzmeti taratqan málimette.
Atalǵan faktiler boıynsha Qylmystyq kodekstiń 204-babynyń 2-bóligi (otpen abaısyz jumys isteý arqyly aýyr zardaptarǵa ákep soqqan nemese asa iri zalal keltirilgen is-áreket), 341-babynyń 1-bóligi (ormandardy joıý), 292-babynyń 3-bóligi (abaısyzda eki nemese odan da kóp adamnyń ólimine ákep soqqan órt qaýipsizdigi talaptaryn buzý) boıynsha sotqa deıingi tergep-tekserý áreketteri bastaldy.
«Adamdardyń qaza bolǵanyn, zardap shekkenderdiń sanyn jáne órt saldarynan keltirilgen shyǵyndy eskere otyryp, qylmystyq ister Bas prokýratýranyń jáne Qostanaı oblysy prokýratýrasynyń arnaıy prokýrorlary basshylyq etetin tájirıbeli quqyq qorǵaý jáne arnaýly organdar qyzmetkerlerinen qurylǵan tergeý-jedel toptardyń is júrgizýine qabyldandy. Tergeý barysy Bas prokýrordyń jeke baqylaýyna alyndy», - dep habar taratty quzyrly organ.
