Bas prokýratýra Qorǵanys mınıstrligimen birlesip, eldegi áskerı nysandardaǵy qarý-jaraqtardyń saqtalý jaǵdaıyn retteýde

dep habarlaıdy QazAqparat.

Esterińizge sala keteıik, osy máselege baılanysty aqpannyń 10-y kúni Jambyl oblysynyń Otar aýylynda Bas áskerı prokýratýra men Qorǵanys mınıstrliginiń birlesken májilisi ótti. Onda áskerı vedomstvolar men prokýratýra organdary qoldanyp otyrǵan sharalarǵa qaramastan, qarý-jaraq aınalymy salasynda qalyptasqan problemalar azaımaı otyrǵandyǵy aıtyldy. Atap aıtqanda, qazir qarý-jaraqtardy urlaý men olar saqtalatyn qoımalardyń jarylýy men qarý-jaraqpen baılanysty tótenshe jaǵdaılar áli de bolsa oryn alýda. Keı jaǵdaıda osy oqıǵalardyń saldarynan adamdar da mert bolýda. Osyndaı jarylystar ótken jyly Arys qalasy men Almatynyń mańaıyndaǵy Qaraoı aýylynda oryn aldy. Atalmysh oqıǵalarǵa baılanysty júrgizilgen tekserýler men Úkimet múshelerinen qurylǵan komıssııa jumysynyń nátıjeleri, sondaı-aq prokýrorlyq tekserýler elimizde qarý-jaraqtar men oq-dárilerdi saqtaýda órt qaýipsizdigine qatysty erejelerdiń saqtamaıtyndyǵyn kórsetken.

Osyǵan baılanysty elimizdegi qarý-jaraq aınalymy máselesin Bas prokýratýra qazir basym baǵyttardyń biri retinde qarastyryp otyr. Ótken jyldyń 3-shi toqsanynda atalmysh saladaǵy zańdardyń oryndalý barysyna túbegeıli tekserý júrgizilip, tekserý jumystary barlyq ókiletti memlekettik organdar men erekshe qaýipti komponentterdi zalalsyzdandyrýmen aınalysatyn kásiporyndardy qamtydy. Tekserý jumystarynyń nátıjeleri boıynsha tıisti sharalar qoldanylyp, olar jónindegi málimetter Úkimet pen Elbasynyń jáne Qaýipsizdik keńesiniń nazaryna jetkizildi. Qazirgi tańda osy máselege baılanysty birqatar uıymdastyrý sharalary júzege asyrylýda.

Otyrysta sonymen qatar Qazaqstan áskeriniń ımıdjin arttyrý máselesi qaraldy. Osyǵan qaraı qazir áskerdiń jaǵymdy bet-beınesin qalyptastyrý men Otan qorǵaýshy kásibin tanymal etý baǵytynda aqparattyq-nasıhat sharalaryn kúsheıtý sharalary qolǵa alynýda.