Bas prokýratýra qyzǵaldaq julǵan adam jóninde: zańdy buzsa, aıyppul salynady

ASTANA. KAZINFORM – Bas prokýrordyń orynbasary Ǵalymjan Qoıgeldıev «Qyzyl kitapqa» engen qyzǵaldaqtardy julǵan Shymkent qalasynyń turǵynyna qatysty pikir aıtty.

Bul rette ol qyzǵaldaqtardy julǵan áıeldiń aıyppuldy naqty qashan tóleıtini týraly habarsyz ekenin jetkizdi.

- Bul keıinirek belgili bolady. Bir aıtarym, qatal bolǵanymen, zań talaptary bar. Eger adam zańdy buzsa, aıyppul salynady. Eger adam zańdy buzbasa, aıyppul salynbaıdy, - dedi Ǵalymjan Qoıgeldıev Senatta tilshiler suraǵyna jaýap bere otyryp.

Osy oraıda ol basqa elderde de osyndaı qatal talaptar bar ekenin eske saldy.

- Biz kóbinese damyǵan elderdi mysalǵa alamyz. Sıngapýrda adam temeki shegip, tuqylyn laqtyryp jiberse, iri kólemde aıyppul salynady. Shvetsııada, Shveıtsarııada, Frantsııada, Germanııada qylmystyq isterdiń 90 paıyzynda aıyppul salady jáne oǵan qosa qylmystyq jaýapkershilik bar. Eger adam urlyq jasasa, 6-7 jylǵa bas bostandyǵynan aıyrylady, ústine aıyppul salynady, - dedi Bas prokýrordyń orynbasary.

Buǵan deıin Túrkistan oblysynda qyzǵaldaq julǵan turǵynǵa qatysty qylmystyq is qozǵalǵanyn jazǵan edik.