Bas prokýratýra QFF-nyń burynǵy basshylyǵy kezindegi zań buzýshylyqtardy anyqtady

ASTANA. KAZINFORM – Qazaqstannyń fýtbol federatsııasy men birneshe fýtbol klýbyna júrgizilgen prokýrorlyq tekserý nátıjesinde basqarýdaǵy tıimsizdik pen 3 mlrd teńge kóleminde qarjylyq zań buzýshylyqtar anyqtaldy. 

Бас прокуратура ҚФФ-ның бұрынғы басшылығы кезінде жасалған бұзушылықтарды анықтады
Фото: ҚФФ

Bas prokýratýra baspasóz qyzmetiniń málimetinshe, negizgi buzýshylyqtar qatarynda negizsiz syıaqylar tóleý, ınfraqurylym obektilerin salý kezinde qarajatty maqsatsyz paıdalaný, sportshylarmen jasalǵan kúmándi kelisimder jáne sportshylardy tamaqtandyrýǵa bólingen qarjyny jymqyrý faktileri bar.

– Federatsııanyń burynǵy basshylyǵy jekelegen qyzmetkerler men sportshylarǵa 300 mln teńgeden astam somada negizsiz syıaqy tólegen. Sondaı-aq Federatsııanyń ákimshilik ǵımaraty men Talǵar qalasyndaǵy jattyǵý bazasyn salý barysynda is júzinde oryndalmaǵan jumystarǵa 350 mln teńgeden asa tólemder jasalǵan. 2021 jyly bastalǵan Almaty oblysyndaǵy baza qurylysy toqtap tur, al merdigerdiń shottary buǵattalǵan. Sonymen qatar 135 mln teńge strategııalyq qujattar men standarttardy ázirleýge bólingen qarajattyń oryndy jumsalýy kúmán týdyrady, - delingen Bas prokýratýra baspasóz qyzmetiniń taratqan habarlamasynda. 

Belgili bolǵandaı, bul qujattarda naqty iske asyrý tetikteri, onyń ishinde jeke ınvestıtsııalardy tartý joldary kórsetilmegen, al klýbtardy basqarý standarty is júzinde engizilmegen. 

Odan bólek «Ordabasy», «Aqtóbe» jáne «Jetisý» fýtbol klýbtaryndaǵy tekserýler de kelisimshart somalaryn asyryp kórsetý, oıynshylardy tómen baǵamen satý, joǵary baǵamen satyp alý jáne qarajat jymqyrý sııaqty birqatar eleýli buzýshylyqtar anyqtaldy. 

Qazirgi kezde sotqa deıingi tergep-tekserý jumystary bastaldy. Fýtbol federatsııasynyń burynǵy basshylaryna qatysty qylmystyq is tergep-tekserý júrgizý úshin Qarjylyq monıtorıng agenttigine berildi. 

Bas prokýratýra sport salasynda zańdylyq pen ashyqtyqty qamtamasyz etý boıynsha jumystardy jalǵastyrady. 

Eske sala keteıik, buǵan deıin Qarjylyq monıtorıng agenttigi Qazaqstan fýtbol federatsııasynyń burynǵy basshylyǵyna qatysty sotqa deıingi tergeýdi bastaǵanyn jazǵan edik. 

Сейчас читают