Bas prokýratýra keıbir ókilettilikterin sotqa berýdi usynyp otyr

ASTANA.QazAqparat - Búgin senatorlarmen kezdesken QR Bas prokýrorynyń orynbasary Iogan Merkel bılik tarmaqtary arasynda ókilettilikterdi qaıta bólý aıasynda prokýratýra organdarynyń jumysyn jeńildetýdi usyndy, dep habarlaıdy QazAqparat tilshisi.

«Búginde sot ınstantsııasyna aınaldyq. Barlyq aryz-shaǵymdar aldymen bizge túsedi. Sodan prokýratýra árbir is boıynsha qarsylyq bildirýge májbúr. Onyń barlyǵy kóp ýaqytty alady, ókilettilikterimiz tym kóp. Máselen, jyldamdyqty asyrǵany jáne bolmashy jol-kólik oqıǵalary boıynsha jumys isteýge týra keledi. Alaıda álemdik tájirıbege sáıkes, adamdar ózderi sotqa baryp, tıisti sheshimderge qarsylyq bildirip jatady», - deıdi Merkel.

Onyń aıtýynsha, usaq zań buzýshylyqtardy birinshi ınstantsııadaǵy sot organdaryna berýge bolady. Ondaıda kez kelgen adam prokýratýranyń kómegine júginbeı-aq, sot arqyly óz quqyǵyn qorǵaı alady. Al prokýratýraǵa naqty qylmystarǵa qatysty isterdi qaldyrý qajet degen usynys bar.

«Bizdińshe, prokýrorlar memlekettik múddesi bar isterge, adamdar ózderin qorǵaı almaǵan jaǵdaıda aralasýy tıis. Iá, búginde halyq arasynda qıt etse, prokýratýraǵa aryz jazý ádeti bar. Degenmen, EDYU (Ekonomıkalyq damý jáne yntymaqtastyq uıymy - avt.) elderiniń qataryna qosylamyz desek, báribir qazirgi júıeni ózgertýge týra keledi», - dep atap kórsetti Bas prokýrordyń orynbasary.

Aıta ketken jón, prokýratýranyń ókilettilikterin sot organdaryna berý tujyrymdamasy áli ázirlengen joq. Aldaǵy ýaqytta atalǵan qujatty depýtattardyń qaraýyna engizý kózdelip otyr.