Qaza tapqan sarbazdardyń analarynyń ýáji nazardan tys qalmaıdy — bas prokýror

ASTANA. KAZINFORM — Bas prokýror Berik Asylov Bas prokýratýra men Bas áskerı prokýratýra basshylyǵy qaza tapqan jáne jaraqat alǵan áskerı qyzmetshilerdiń analaryn qabyldaıtynyn aıtyp, áleýmettik jelidegi paraqshasyna jazdy.  

— Memleket basshysynyń tapsyrmasyn oryndaý maqsatynda Bas prokýratýra men Bas áskerı prokýratýra basshylyǵy qaza tapqan jáne jaraqat alǵan áskerı qyzmetshilerdiń analaryn qabyldaıdy. Olardyń árbir ýáji nazardan tys qalmaıdy, — dep jazdy Berik Asylov. 

Ol bul jumysqa Qorǵanys mınıstrligi men Ulttyq ulannyń ortalyq apparattarynyń ókilderi tartylǵanyn aıtty.

— Sondaı-aq áskerı qyzmetshilerdiń qaza tabýy men jaraqat alýyn boldyrmaý jónindegi jumystarǵa, áskerı qyzmetke shaqyrýdyń zańdylyǵyna jáne medıtsınalyq qyzmettiń qorytyndylarynyń negizdiligine baǵa beriledi.

Osy jumysqa Qorǵanys mınıstrligi men Ulttyq ulannyń ortalyq apparattarynyń ókilderi tartyldy, — dedi ol.

Eske salsaq keshe Prezıdent áskerde qaza tapqan sarbazdarǵa qatysty isti tergeý kezinde zańnyń saqtalýyn qadaǵalaýdy tapsyrǵan edi. 

Qasym-Jomart Toqaev Bas prokýrorǵa áskerde qaza tapqan sarbazdardyń analarynan túsken aryz-shaǵymdy 12 kún ishinde qarastyryp, isti tergeý barysynda zańnyń saqtalýyna baǵa berýdi tapsyrdy.