Bas prokýratýra qarjy pıramıdasyn qurǵandar eldi qalaı arbaıtynyn aıtty

ASTANA. KAZINFORM — 2024 jyly Qazaqstan Bas prokýratýrasynyń Azamattardy qabyldaý ortalyǵyna 5,5 myńnan astam aryz ıesi kelgen.

— Olardyń kópshiligi qarjylyq pıramıdalarǵa qatysty shaǵymmen kelgen. Qarjy pıramıdasynyń qurbany bolmaý joldaryn aıtyp, sizdi eskertpekshimiz, — delingen vedomstvo habarlamasynda.

Qarjy pıramıdasynyń negizgi belgileri:

• Lıtsenzııasynyń/eseptik tirkeýiniń bolmaýy;
• Buqaralyq aqparat quraldaryndaǵy (BAQ) agressıvti jarnama;
• Kompanııanyń qyzmet týraly naqty málimet joq;
• Ónimdi/qyzmetti satyp alýǵa kóndirý jaǵdaılary.

Pıramıda ekenin qalaı bilýge bolady:

Olar ádette jarnamalaý kezinde mynandaı sózderdi kóbirek qoldanady:

• joǵary tabysty bıznes;
• kepildi tabys;
• joǵary tabysty onlaın joba;
• onlaın tabys;
• ınnovatsııalyq joba.

Negizgi urandary:

• «Aqsha tabýǵa asyǵyńyz!»
• «Óz múmkindigińizdi jiberip almańyz»
• «Qaryzdan qutylasyz!»
• «Búgin ınvestıtsııalańyz!»
• «Sizge bank bas tartty ma? Biz kómektesemiz!».

Bas Prokýratýra Qarjy pıramıdasyn qurǵan úshin qylmystyq jaýaptylyq kózdelgenin eske saldy.

— Qylmystyq kodekstiń 217-babynda múlki tárkilenip bes jyldan on eki jylǵa deıin bas bostandyǵynan aıyrý jazasy qarastyrylǵan. Sonymen qatar qarjy pıramıdasyn jarnamalaǵan úshin Qylmystyq kodekstiń 217-1-babynda múlki tárkilenip, eki myń aılyq eseptik kórsetkishke deıingi mólsherde aıyppul salýǵa, alty júz saǵatqa deıingi merzimge qoǵamdyq jumystarǵa tartýǵa, eki jylǵa deıingi merzimge bas bostandyǵyn shekteýge, ne sol merzimge bas bostandyǵynan aıyrý jazasy qarastyrylǵan. Salǵan aqshalaı qarajattan aıyrylyp qalý qaýpin jáne teris saldaryn boldyrmaý maqsatynda azamattardy kúmándi qarjy shemalaryna qatyspaýdy suraımyz. Saq bolyńyz! Arandatýshylyqqa berilmeńiz! Ońaı aqsha bolmaıdy!, — dep eskertti prokýratýra.

Eger qarjy pıramıdasyna tap boldym degen kúmán paıda bolsa, sizge dereý tómende kórsetilgen organdarǵa júginý qajet:

• Turǵylyqty ornyńyz boıynsha quqyq qorǵaý organdaryna
• QR Іshki ister mınıstirligine
• QR Qarjylyq monıtorıng agentigine
• QR Qarjy naryǵyn retteý jáne damytý agentigine júginý qajet.

Osyǵan deıin ShQO-da eki qarjy pıramıdasyna kirgen 250 adam 400 mln teńge shyǵynǵa batqanyn jazǵan edik.