Bas prokýratýra qańtarda 24 qyzylordalyqqa tabeldik qarý qoldaný sebebin aıtty

NUR-SULTAN. QazAqparat – QR Bas prokýratýrasynyń 1 qyzmet bastyǵynyń orynbasary Eldos Qılymjanov qańtar oqıǵasynda qaza bolǵan 24 qyzylordalyqqa tabeldik qarý qoldanylý sebepterin aıtty, dep habarlaıdy QazAqparat tilshisi.

«Adamdardyń qaza bolý mán-jaılaryn anyqtaý jumystary jalǵasýda. «Qaıǵyly qańtar» barysynda adam óliminiń barlyq faktileri boıynsha qylmystyq qýdalaý organy muqııat tergeý júrgizýde, bolǵan oqıǵanyń mán-jaılary kún saıyn ashylýda. Qyzylorda oblysynda qaza bolǵan 24 adamǵa qatysty tabeldik qarýdy qoldaný sebepteri anyqtaldy», - dedi Eldos Qılymjanov.

Onyń aıtýyna qaraǵnada 5 qańtarda Qyzylorda oblysy polıtsııa departamentiniń jergilikti polıtsııa qyzmetine qarýly shabýyl jasalǵan.

«Terrorıster júk kóligimen ǵımarattyń qaqpasyn soǵyp kirip, onda olar ańshy myltyqtarymen oq jaýdyrdy, baqylaý-ótkizý pýnktin, jedel basqarý ortalyǵynyń kameralary men patrýldik mashınalardy órtedi. Osyǵan baılanysty polıtsııa aldymen aýaǵa atyp, sodan keıin shabýyldaýshylardyń aıaq-qolyn nysanaǵa alyp, tabeldik qarýdy qoldanýǵa májbúr boldy.

Alaıda, bul olardy toqtatpady. Alkogol men esirtkiniń áserinde bolyp, olar ǵımaratqa birneshe ret shabýyl jasady. Ekinshi shabýyldan keıin alty adamnan turatyn top kelissózder túrinde Jergilikti polıtsııa qyzmetiniń bastyǵy Ibraev pen rota komandıri Estaevty aldap shaqyrdy.

Osy sátti paıdalanyp, kelissóz júrgizýshiniń biri buryn sotty bolǵan «O» esimdi azamat rota komandıri Estaevqa sholaq myltyqpen tike oq atqan. Qarsy atylǵan oqpen onyń kózi joıyldy. Estaev kóptegen dene jaraqattary, úlken qan joǵaltýymen aýyr halde reanımatsııaǵa jetkizildi, onyń ómirin áreń saqtap qalý múmkin boldy», - dedi Bas prokýratýra ókili.

Aıtýynsha, 12-i saǵat boıy qorshaý kezinde jergilikti polıtsııa qyzmeti ǵımaratyna 10-nan astam qarýly shabýyl jasalǵan.

«Olarǵa toıtarys berý nátıjesinde 20 shabýylshynyń kózi joıyldy. Munymen qosa, Qyzylorda qalasy Polıtsııa basqarmasynyń ǵımaratyn basyp alýǵa áreket jasaldy. Oǵan toıtarys berý kezinde 4 shabýylshynyń kózi joıyldy», - dedi QR Bas prokýratýrasynyń 1 qyzmet bastyǵynyń orynbasary.

Bas prokýratýra deregi boıynsha, qańtar oqıǵasy kezinde Almaty qalasyndaǵy jappaı tártipsizdikterge 12 uıymdasqan qylmystyq top qatysqan.