Bas prokýratýra: Qańtar oqıǵasyna qatysty ustalǵan 27 jasóspirim bosatyldy
Onyń jumysyna Bas Prokýrordyń mindetin atqarýshy Berik Asylov, Adam quqyqtary jónindegi ýákiletti Elvıra Ázimova men Respýblıkalyq advokattar alqasy tóraǵasynyń orynbasary Igor Vranchev, sondaı-aq quqyq qorǵaý jáne arnaıy organdardyń basshylary qatysty.
Іs-sharany ashqan B.Asylov Memleket basshysynyń tapsyrmasy boıynsha qaıǵyly oqıǵanyń sebepteri muqııat tergep-tekserilip jatqanyn atap ótti.
«Qazir biz beıbit mıtıngilerdi ártúrli kúshterdiń paıdalanǵanyn naqty bilemiz. Uıymdastyrýshylar destrýktıvti jáne qylmystyq toptardy tartyp, qarýlandyryp, olardyń áreketterin úılestirgen. Tártipsizdikter azamattarǵa qarsy zorlyq-zombylyqpen, qıratýmen jáne tonaýmen qatar júrgen. Olardyń maqsaty halyqty qorqytyp, bıliktiń jumysyna tosqaýyl qoıý bolǵan», - dedi B.Asylov.
Bas prokýratýranyń Qylmystyq qýdalaý qyzmetiniń bastyǵy Serik Shalabaev óz kezeginde: «Jappaı tártipsizdikter kezinde jáne odan keıin ustalǵan tulǵalardyń quqyqtarynyń saqtalýyn Bas prokýratýra erekshe baqylaýda. Búgingi tańda azaptaý jáne qyzmettik ókilettikti asyra paıdalaný boıynsha 203 qylmystyq is qozǵalǵan, olardyń ishindegi eń rezonanstylaryn arnaıy prokýrorlar tergeýde. Sotqa deıingi tergep-tekserý barysynda ustalǵandarǵa qatysty zańsyz tergeý ádisterin qoldandy degen kúdikpen 9 qyzmetker anyqtalyp, ustaldy», - dep atap ótti.
S.Shalabaevtyń aıtýynsha, qańtardaǵy qaıǵyly oqıǵanyń nátıjesinde tergeý-jedel toptary terrorızm aktileri, kisi óltirý, qarý urlaý jáne jappaı tártipsizdikter boıynsha 3502 qylmystyq isti tergeýde. Olardy boıynsha 737 kúdikti adam tergeý ızolıatorynda qamaýda.
Sondaı-aq ol, bultartpaý sharasyn ózgertýmen 307 adam, onyń ishinde 27 kámeletke tolmaǵandar bosatylǵanyn, odan basqa eki kámeletke tolmaǵandar qamaýda qalǵany týraly aıtty. Búginde bultartpaý sharasyn ózgertý týraly arnaıy prokýrorlardan taǵy 22 adamǵa qatysty materıaldar túsken.
«Qańtar oqıǵasyna qatysty ister boıynsha 1,5 myńǵa jýyq oqıǵa oryndaryn qaraý júrgizildi, 1500-den astam sot-medıtsınalyq saraptamalar taǵaıyndaldy. Prokýratýra organdaryna tergeýdiń zańsyz ádisteri men azaptaýdy qoldaný týraly 283 aryz tústi. Oǵan kináli quqyq qorǵaý organdarynyń qyzmetkerleri zań aldynda qatań jaýapqa tartylatyn bolady», - dedi S.Shalabaev.
Qadaǵalaý organy barlyq jaǵdaıda daýsyz dálelderge negizdelgen obektıvti jáne beıtarap baǵa berilip, azamattardyń konstıtýtsııalyq quqyqtarynyń qolsuǵylmaýshylyǵy qamtamasyz etiletinine sendirdi.
Jıyn sońynda Bas Prokýrordyń m.a. Konstıtýtsııaǵa sáıkes memlekettiń eń joǵary qundylyǵy adam jáne onyń ómiri, quqyqtary men bostandyqtary ekenin atap ótti. Negizgi zań azaptaýǵa, zorlyq-zombylyqqa, qatygezdikke nemese ar-namysty qorlaıtyn áreketterge naqty tyıym salady.
Prokýrorlar tergeý ızolıatorlary men basqa da qyzmettik úı-jaılardy kún saıyn, onyń ishinde túngi ýaqytta jáne demalys kúnderi tekserýdi jalǵastyrady.
Bul jumys Ulttyq aldyn alý tetiginiń qatysýshylarymen jáne quqyq qorǵaýshylarmen tyǵyz baılanysta júrgiziletin bolady.
