Bas prokýratýra qańtar oqıǵasy boıynsha ustalǵan sheteldikterdiń qandaı kúdikke ilingenin aıtty

NUR-SULTAN. QazAqparat – QR Bas prokýratýrasy Qylmystyq isterdi qadaǵalaý qyzmetiniń bastyǵy Serik Shalabaev qańtar oqıǵasy kezinde ustalǵan sheteldikter qandaı kúdikke ilingenin málim etti, dep habarlaıdy QazAqparat tilshisi.

«Terrorızm jáne jappaı tártipsizdikke qatysý kúdigi boıynsha ustalǵandardyń arasynda shetel azamattary boldy ma?», - dep surady depýtat Asqarbek Úısimbaev Májilistiń jalpy otyrysynda.

Bas prokýratýra ókiliniń aıtýynsha, qazir 19 shetel azamaty kúdikti retinde ustalǵan.

«Búgingi kúni bizde qylmystyq óndiris boıynsha jalpy 19 sheteldik azamat bar. Onyń basym kópshiligi, 11-i – Ózbekstan azamattary, tórteýi – Reseıden, ekeýi – Qyrǵyzstannan jáne Qytaı Halyq Respýblıkasy men Tájikstannan 1 adamnan bar. Bul azamattardyń is-áreketteri jappaı tártipsizdikterge qatysý boıynsha, urlyq jáne basqa da qylmystarmen dárejelenedi. Árıne, bul málimetter túpkilikti emes. Tergeý júrip jatyr, ózgerýi múmkin», - dedi Serik Shalabaev.