Bas prokýratýra ishki ister organdarynyń birqatar ýaqytsha ustaý ızolıatorlarynyń qyzmetin toqtatty

Bas prokýratýra taratqan málimetterge qaraǵanda, bul shara ishki ister salasyna qarasty ǵımarattardyń tıisti talaptar men normatıvterge, qamaýǵa alynǵandardy ustaýdyń eń tómengi standartty erejelerine saı kelmeýine jáne sanıtarlyq-epıdemıologııalyq normalardyń saqtalmaýyna baılanysty qolǵa alynyp otyr.

Sondaı-aq prokýratýranyń málimetterinshe, osy organnyń usynysy negizinde arnaıy ekonomıkalyq sottyń sheshimi boıynsha anyqtalǵan zań buzýshylyqtardy joıǵanǵa deıin Ońtústik Qazaqstan oblysy, Ordabasy aýdanynyń ýaqytsha ustaý ızolıatorynyń qyzmeti toqtatyldy. Qazirgi tańda Kentaý, Túrkistan qalalary, Tóle bı jáne Shardara aýdandary ishki ister bólimderiniń ýaqytsha ustaý ızolıatorlarynyń qyzmetin toqtatý týraly prokýratýranyń talap-aryzdary sotta qarastyrylýda.

Qostanaı oblysynyń prokýratýrasy da Altynsarın, Qamysty, Fedorov jáne Taran aýdandary ishki ister bólimderiniń ızolıatorlarynyń qyzmetin toqtatty. Іshki ister mınıstrligi Ákimshilik polıtsııa komıtetindegi ýaqytsha ustaý ızolıatorlarynyń qyzmetin retteıtin normatıvtik quqyqtyq aktilerin qabyldaý zańdylyǵyna tekserý júrgizý barysynda da zań buzýshylyqtar, vedomstvolyq buıryqtardyń qoldanystaǵy zańnamalarǵa sáıkes kelmeý derekteri anyqtaldy. Tekseris qorytyndysy boıynsha Bas prokýratýra aldyn ala ustaý oryndarynyń qyzmetin retteıtin Іshki ister mınıstrliginiń buıryqtaryna úsh narazylyq engizdi.