Bas prokýratýra ıpotekalyq zaemdardy qaıta qarjylandyrýǵa arnalǵan qarjynyń ózge nesıelerdi qarjylandyrýǵa baǵyttalǵandyǵyn anyqtady
ASTANA. Aqpannyń 25-i. QazAqparat /Aıdar Ospanalıev/ - Ulttyq qordan daǵdarystyń saldaryn joıý maqsatynda bólingen qarjy Úkimettiń ekonomıkany turaqtandyrý jónindegi sharalaryna saı júzege asyryldy. Soǵan qaramastan, ulttyq qor qarajatyn ıgerýde birshama kemshilikterge de jol berilgen.
Mysaly, múmkindigi shekteýli jandar men zeınetkerlerdiń jáne az qamtylǵan otbasylarǵa arnalǵan jeńildikterdi osy sanatqa jatpaıtyn azamattarǵa berýdiń 8 faktisi anyqtaldy. Bul týraly búgin quqyq qorǵaý organdarynyń Úılestirý keńesiniń otyrysynda Bas prokýrordyń orynbasary Asqat Daýylbaev aıtty, dep habarlaıdy QazAqparat.
Onyń málimetterine qaraǵanda, ıpotekalyq zaemdardy qaıta qarjylandyrýǵa arnalǵan qarjynyń zańsyz túrde ózge nesıelerdi qarjylandyrýǵa baǵyttalǵandyǵy anyqtaldy. Bankter tutynýshylyq maqsattar men keıinge qaldyrýǵa bolmaıtyn qajettilikterge bólingen qarjyny paıdalana otyryp, eshqandaı negizsiz 14 zaımdy qaıta qarjylandyrǵan. Sonymen qatar shaǵyn jáne orta bıznesti damytý baǵdarlamasyna bólingen qarjyny memlekettik baǵdarlamada kórsetilmegen maqsattarǵa bólý jaǵdaılary da anyqtaldy. «Ulttyq qordyń qarjysyn ıgerýge qatysty júrgizilgen tekserýlerdiń nátıjesi boıynsha ótken jyldyń shilde aıynda Qarjylyq baqylaý agenttigi men «Samuryq-Qazyna» qory jáne Bas prokýratýraǵa jiberilgen kemshilikterdi joıyp, kináli azamattardy jaýapqa tartýǵa baılanysty usynys jasaldy. Al «Qazagro» holdıngine tek azdaǵan ǵana kemshilikterdiń jiberilýine baılanysty olar boıynsha tıisti jumystar júrgizý jóninde usynys jasaldy», dedi prokýrordyń orynbasary.
Onyń aıtýynsha, osy kemshilikterdi joıý jónindegi Bas prokýratýranyń talaptary tolyǵymen oryndalǵan.
