Bas prokýratýra halyqty sýmen qamtamasyz etý aıasyndaǵy tekserýlerdiń nátıjesin jarııalady
ASTANA. Shildeniń 22-si. QazAqparat /Rýslan Ǵabbasov/ - Búgin Astanada ótken aptalyq brıfıngte Bas prokýratýra halyqty sýmen qamtamasyz etý kezinde, onyń ishinde «Aýyz sý» memlekettik baǵdarlamasyn iske asyrý kezinde zańdardyń saqtalýyna turaqty qadaǵalaý aıasynda tekserýlerdiń nátıjesin jarııalady.
«Shyǵys Qazaqstan, Jambyl, Pavlodar, Qostanaı jáne Soltústik Qazaqstan oblystarynda memlekettik satyp alý rásimderin ótkizý kezinde zań talaptaryn buzý faktileri anyqtalǵan. Osy óńirlerde sýmen jabdyqtaý obektileri qurylysyn salý jónindegi konkýrstarǵa qatysýǵa konkýrstyq ótinimdi qoldaný merzimderi ótip ketken. Biliktilik talaptaryna sáıkes kelmeıtin kompanııalar jiberilip, konkýrs jeńimpazdary bolyp tanylǵan», - dedi búgin Astanada ótken brıfıngte Bas prokýratýranyń resmı ókili Nurdáýlet Súıindikov
Onyń sózine qaraǵanda, jergilikti atqarýshy organdar keıbir jaǵdaılarda jumysty aıaqtaý merzimderin buzǵan merdigerlerden aıyppul sanktsııalaryn óndirip alý jónindegi sharalardy qoldanbaıdy. «Mysaly, Ońtústik Qazaqstan oblysynyń Qojatoǵaı aýylynda sý qubyry qurylysyn salý merzimin 300 kúnge jýyq merzimge keshiktirgen «ıÝKaz-Qurylys» JShS-inen 17 mln. teńge mólsherinde aıyppul óndirip alý týraly sheshim prokýror qoldanǵan sharalar nátıjesinde ǵana qabyldandy», - dedi ol.
Prokýratýranyń málimetine qaraǵanda, jumys oryndalmaǵan nemese onyń kólemi asyra kórsetilgen sý qubyry toraptary obektilerin qabyldaý faktileri de oryn alǵan.
«Aqtóbe oblysynda Hromtaý aýdany Abaı aýylynyń sý qubyry toraptaryn qaıta salýǵa 110 mln. teńgeden astam bıýdjet qarajaty jumsalǵan, qaǵaz júzinde obekt paıdalanýǵa berilgen. Alaıda, tekserý kezinde sý qubyry jumys istemegen, jartylaı bólshektenip jatqan. Aýyldy sýmen jabdyqtaý rezervýardan júrgizilgen, al onda sý Hromtaý qalasynan avtokólikpen jetkizilip otyrǵan. Osyndaı oqıǵalar basqa jerlerde de kezdesedi», - dedi N. Súıindikov.
Onyń aıtýynsha, Aqmola, Shyǵys Qazaqstan, Jambyl, Qaraǵandy, Soltústik Qazaqstan oblystarynda salynǵan sýmen jabdyqtaý obektilerin zańdy túrde bekitý, olardy kútý jáne halyqqa sý berý jónindegi jumys tıisti deńgeıde uıymdastyrylmaǵan
«Sýmen jabdyqtaý obektileriniń sanıtarlyq-epıdemıologııalyq talaptarǵa sáıkes kelmeý faktileri anyqtaldy. Pavlodar oblysynyń 71 aýylynda aýyz sý sapasy sanıtarlyq normalarǵa saı kelmeıdi. Ońtústik Qazaqstan oblysynyń Ordabasy aýdanynda 2009 jyly ornatylǵan 17 sý tazartý qurylystarynyń 15-i jumys istemeıdi», - dedi resmı ókil.
Jalpy alǵanda, sýmen qamtamasyz etý máseleleri turǵysynda tekserýler nátıjeleri boıynsha prokýrorlar ústimizdegi jyldyń basynan bastap zań buzýshylyqty joıý týraly 60-tan astam usynys engizdi. 3 qylmystyq is, 25 ákimshilik quqyq buzýshylyq týraly is qozǵaldy, 15 materıal protsessýaldyq sheshim qabyldaý úshin qarjy polıtsııasyna jiberildi.
