Bas prokýratýra esirtkige qatysty aqshany baqylaýǵa arnalǵan JI platformasyn iske qosty
ASTANA. KAZINFORM — Bas prokýratýrada Shymkent qalasyprokýratýrasynyń otandyq IT-ázirleýshilermen birlesip quralǵan esirtki qylmysyna qarsy kúreske arnalǵan eki ınnovatsııalyq qural «CryptoTrace» jáne «ProkAi» tanystyryldy. Bul týraly bas prokýror Berik Asylov áleýmettik jelidegi paraqshasynda jazdy.
Eki joba da Memleket basshysynyń «Zań men Tártip» ıdeologemasyn qoǵamda ilgeriletý sheńberinde óteýsiz negizde iske asyryldy jáne prokýratýranyń teńgerimine berildi.
«Crypto Trace» — bul jańa býynnyń izdeý júıesi, ol jelidegi tranzaktsııalardy taldaýǵa jáne esirtki bıznesiniń aqshasyn anyqtaýǵa kómektesetin.
«ProkAi» — ınternettegi esirtki saýdasyn anyqtaýǵa qabiletti ıntellektýaldy platforma.
Jasandy ıntellekt 24/7 jumys isteıdi jáne kásibı mamanǵa qaraǵanda ondaǵan, tipti júzdegen ese kóp izdeý operatsııalaryn oryndaýǵa qabiletti.
— «ProkAi» chat-boty jumys istegen úsh aıdyń ishinde 2 000-nan astam dropperler shoty anyqtaldy. Baǵdarlama qylmyskerlerden alynǵan SimBox qurylǵylarynyń kómegimen esirtki dúkenderiniń júzdegen nómirine qosylady jáne qylmystyq shottardyń keń aýqymyn qamtamasyz etedi, — dep jazdy Berik Asylov.
Jańa quraldar resýrstardy ońtaılandyrýǵa jáne kadrlardy basqa da basym mindetterdi sheshý úshin bosatýǵa múmkindik beredi.
— Baǵdarlamalyq ónim naqty tergep-tekserýde esirtki dúkenine qatysty qylmystyq is boıynsha synaldy. Dropperlerdiń 15 myńnan astam shoty onyń ishinde 2 myńǵa jýyǵy qazaqstandyq, 13 myńnan astamy sheteldik jáne 620 krıptovalıýta shottary anyqtaldy. Júzden astam dropperler qylmystyq jaýaptylyqqa tartyldy. Sońǵy paıda tabýshylardyń naqty krıpto-ámııandaryn tez arada anyqtaýǵa múmkindik týdy, bul tergep-tekserýdiń tıimdiligin edáýir arttyrdy. Bul ámııandarda shamamen 5 mln USDT somasyna aktıvter bar, bul esirtkini satýdan bolatyn zańsyz qarjylyq aǵyndardyń aıtarlyqtaı kólemin kórsetedi. Shymkent qalasy prokýratýrasynyń qyzmetkerleri men IT-kompanııasynyń ázirleýshilerine «Zań men Tártipti» qamtamasyz etý isinde «aqyldy» sheshimder jasaýǵa qosqan eleýli úlesi úshin men alǵys jarııaladym, — dedi ol.
Ázirlengen baǵdarlamalar búkil el boıynsha azamattardyń quqyqtary men memleket múddelerin qorǵaý úshin engiziletin bolady.
JI quqyqtyq tártiptiń bir bóligine aınalady bul tek tergep-tekserýge ǵana emes, sonymen qatar tehnologııany qoldaný arqyly jasalǵan qylmystardyń aldyn alýǵa da kómektesedi.
Aıta ketelik Qaraǵandy oblysynda 900 keliden astam esirtki tárkilendi.