Bas prokýratýra: Endi sottalǵandar jazany óteý kezeńindegi taǵdyrlaryn ózderi aıqyndaıdy

ASTANA. QazAqparat - Qylmystyq atqarý kodeksi jáne Ákimshilik quqyq buzýshylaqtar týraly kodeksiniń jańa modeline kóshý arqyly jazany óteý úderisin daralaý úshin sottalǵan adamnyń tártibin baǵalaý engizilýde.

Bul týraly búgin Astanada ótip jatqan semınar-keńeste QR Bas prokýrorynyń orynbasary Jaqyp Asanov málim etti.

«Jazany óteý úderisin daralaý úshin sottalǵan adamnyń tártibin baǵalaý engizildi. Endi sottalǵandar jazany óteý kezeńinde taǵdyrlaryn ózderi aıqyndaıdy. Tártiptiń alty dárejesi boıynsha quqyqtyq jaǵdaıdy naqty árekettermen ózgertýdiń múmkindikteri bekitildi. Mysaly, birinshi dáreje - qamaýda ustaýdyń qarapaıym jaǵdaıy, ekinshisi - jeńildetilgen, úshinshisi - jeńildikti sharttar, tórtinshisi - kolonııa túrin ózgertý, jazany neǵurlym raqymdy túrine aýystyrý, sondaı-aq sońǵy túri merziminen buryn shartty bosatýǵa baılanysty», -dedi J. Asanov Qylmystyq atqarý kodeksi jáne Ákimshilik quqyq buzýshylyqtar týraly kodeksiniń jańa modeline kóshý máseleleri boıynsha semınar-keńeste.

Osy oraıda sottalǵannyń túzelýine qaraı qamaýda ustaý jaǵdaıyn naqty jikteý júrgizilýde.

J. Asanovtyń sózine qaraǵanda, jańa Qylmystyq atqarý kodeksi kóbinese sottalǵandardyń quqyǵyn qorǵaýǵa negizdelgen. Onda qoǵamdyq baıqaýshylar komıssııasy men ulttyq aldyn alý tetigi qyzmeti túrindegi qoǵamdyq baqylaýdyń múmkindikteri aıtarlyqtaı keńeıtilgen.

Atap aıtqanda, jańa júıede jazany óteý kezeńinde sottalýshynyń qaýipsizdigin qamtamasyz etýge aıryqsha kóńil bólinip otyr.