Bas prokýratýra elimizdiń bilim berý mekemelerindegi kóptegen kemshilikterdiń betin ashty
ASTANA. 4 qarasha. QazAqparat /Aıdar Ospanalıev/ - Elimizdegi bilim berý mekemelerindegi ustazdar men ózge de qyzmetkerlerdi jáne ata-analardy jóndeý jumystaryna tartý barysyndaǵy eńbek zańnamalarynyń oryndalýyna taldaý júrgizgen Bas prokýratýra bul salada kóptegen kemshilikterdi anyqtady. Bul máseleler jóninde búgin jýrnalıstermen bolǵan brıfıngte Bas prokýratýranyń resmı ókili Jandos Ómirálıev málim etti.
Onyń aıtýynsha, elimizdiń kóptegen bilim berý mekemelerinde ózderiniń qyzmetkerleriniń kúshimen atqarýǵa tyıym salynǵan jumystar júzege asyrylýda. Sondaı-aq kóptegen mekemeler sol ujym tarapynan aqyly túrde kórsetiletin qyzmetterden túsetin qarjy men bıýdjet qarjysy arqyly materıaldyq-tehnıkalyq bazany jabdyqtaý jónindegi zańnamalardy da buzyp otyr.
«Mysaly Qostanaı oblysynda ornalasqan Mámetova, Glazýnovskaıa atyndaǵy mektepterdiń basshylary mektepti ujymnyń kúshimen aǵymdaǵy jóndeýden ótkizý týraly zańsyz buıryq shyǵarǵan. Mundaı zańsyzdyqtar Almat qalasy men Jambyl, Pavlodar, Aqmola, Soltústik Qazaqstan, Ońtústik Qazaqstan, Atyraý oblystarynda da oryn aldy», - dedi resmı ókil.
Sondaı-aq ol sózinde Pavlodar qalasyndaǵy 22 mektepte tehnıkalyq qyzmet kórsetetin qyzmetkerlerdi sylaý, syrlaý, jóndeý sııaqty olardyń mindetine jatpaıtyn jumystarmen aınalysýǵa májbúrlegen. Al osy jumystar úshin eńbekkerlerge eshqandaı da qosymsha qarjy tólenbegen.
