Bas prokýratýra elimizdegi birqatar arnaýly bilim berý mekemelerinde balalardyń qaýipsizdigi qamtamasyz etilmeıtindigin anyqtady

«Atap aıtqanda, jekelegen arnaýly mekemeler zańmen belgilengen talaptardy buza otyryp, óz terrıtorııalarynyń tıisinshe kúzetilýin qamtamasyz etpegen. Mysaly, Pavlodar qalasyndaǵy arnaýly mekeme aýmaǵynda qarapaıym qorshaýlar da bolmaǵan. Bógde adamdardyń kelýi baqylaýǵa alynbaǵan, tıisinshe olardyń jaýapkershiligindegi balalardyń qaýipsizdigi qamtamasyz etilmegen»,-dedi resmı ókil.

Minez-qulyqtarynda aýytqýshylyqtary bar tárbıelenýshiler mekeme aýmaǵynan óz erikterimen birneshe ret ketip qalý faktileri jıi oryn alyp otyrǵan.

Joǵaryda atalǵan Pavlodar qalasyndaǵy arnaýly mekemede 2010 jyl ishinde 23 tárbıelenýshi mektep aýmaǵynan óz erikterimen ketip qalǵan. Olardyń 7-ýi júıeli túrde birneshe ret boı tasalaǵan. Osyǵan uqsas jaǵdaılar 2009 jyly da oryn alǵan.

Jýyrda osyndaı faktiler Almaty qalasyndaǵy arnaýly mekemesinde de boldy. Onyń 9 tárbıelenýshisi qashyp ketken.

«Óz erikterimen birneshe ret ketip qalý faktileri Jambyl, Shyǵys Qazaqstan jáne Qyzylorda oblystaryndaǵy arnaýly mekemelerde de oryn alǵan. Aıtyp ótý qajet, keıbir jaǵdaılar boıynsha arnaýly mekeme basshylary boı tasalaǵan balalardy izdestirý týraly quqyq qorǵaý organdaryna da júginbegen. Kerisinshe, kóbinde atalǵan faktilerdi jasyrýǵa tyrysqan»,-dep atap kórsetti J. Ómirálıev.

Onyń aıtýynsha, osyndaı salǵyrttyqtyń nátıjesinde atalǵan tárbıelenýshi balalar qylmys jasaýǵa barǵan. «Mysaly, Pavlodar qalasyndaǵy arnaýly mekemeden qashyp ketken 23 tárbıelenýshiniń 7-ýi qylmys jasaǵan. Mekeme aýmaǵynyń tıisinshe kúzetilmeýi spırt ishimdikteri jáne osy sııaqty basqa da zańmen tyıym salynǵan zattardy mekemelerge alyp ótýler jaǵdaıyna da alyp kelgen»,-deıdi resmı ókil.