Bas prokýratýra elimizde zańgerler qajettilikten artyq daıarlanyp jatqanyn alǵa tartýda
ASTANA. QazAqparat - JOO-lardyń kóbisinde zańgerler daıarlyǵy qyzmettiń janama túri retinde baıqalyp otyr. Bul týraly búgin Astanada «Qazaqstan Respýblıkasynda zańger mamandardy daıarlaý týraly» respýblıkalyq forýmda QR Bas prokýrorynyń orynbasary Andreı Kravchenko málim etti.
«Búginde elimizdegi 126 JOO-nyń árbir ekinshisi zańgerlerdi daıarlap keledi. Jalpy sońǵy 12 jylda 185 myńnan astam zańger daıarlandy. Sonymen qatar jańadan oqyp shyqqan zańgerlerdiń sany tómendegen joq, ıaǵnı bıyldyń ózinde 18 myńnan astam zańger oqý bitirdi. Bul kórsetkish 10 jyl burynǵydan 4 ese artyq», - dedi prokýror.
Onyń sózine qaraǵanda, zańgerlerdi daıarlap jatqan JOO-lardyń basym bóligi beıindi emes. Olar úshin zańgerlik bilim qyzmettiń qosymsha túri bolyp tabylady, sebebi bul turǵyda kommertsııalyq múdde basymyraq. Osy oraıda zańgerlik oqý oryndary daıarlaǵan túlekterdiń kóbisi tıisti deńgeıde oqytylmaǵandyqtan, eńbek naryǵynda suranysqa ıe bolmaı otyr.
Sonymen qatar A. Kravchenko ázirlenip jatqan reformalar aıasynda quqyq qorǵaý júıesi bilikti mamandardy qajet etetinin, alaıda, qazaqstandyq JOO-lar qylmysty zertteıtin krımınologtardy qajetti kólemde daıarlap shyǵarýǵa qaýqarsyz ekendigin qadap aıtty.
Búginde krımınologııalyq taldaý men boljaýdyń qajettigine, sondaı-aq qylmystyq jeke túrlerimen kúreste strategııany ázirleýge baılanysty krımınologııa ǵylym men oqý páni retinde qazirgi zamanǵy kezeńde aıryqsha ózektilikke ıe bolyp otyr.
