Bas prokýratýra ekstremızmge shaqyratyn 400-den astam saıttardy anyqtady
ASTANA. 20 qazan. QazAqparat /Aıdar Ospanalıev/ - Bas prokýratýra elimizde ekstremızmge shaqyratyn sondaı-aq terrorıstik aktilerdi qoldaýǵa baǵyttalǵan materıaldar jarııalanǵan 400-den astam saıttardy anyqtady.
Bul týraly búgin jýrnalıstermen bolǵan brıfıngte Bas prokýratýranyń resmı ókili Nurdáýlet Súıindikov málim etti.
Onyń aıtýynsha, Bas prokýratýra basqa quqyq qorǵaý jáne ýákiletti organdarmen birlese otyryp, zań tyıym salǵan aqparatty taratý faktilerin anyqtaý jáne aldyn alý maqsatynda ınternet keńistigine turaqty monıtorıng júrgizip otyrady.
«Astana qalasynyń prokýrorymen Baılanys jáne aqparat mınıstrliginiń talap-aryzdary boıynsha astanalyq aýdandyq sottar 151 saıttyń ónimin zańsyz dep taný jáne olardyń qyzmetin Qazaqstan Respýblıkasynyń aýmaǵynda taratýdy toqtatý týraly sheshim shyǵardy», - dedi resmı ókil.
Onyń derekterine qaraǵanda, prokýratýranyń 215 saıtqa qatysty 14 talap-aryzy men Baılanys jáne aqparat mınıstrliginiń 11 saıtqa qatysty aryzy sot qaraýynda jatyr. Sonymen qatar taǵy 100-den astam saıt boıynsha talap-aryzdar daıyndalý ústinde. «Bas prokýratýra ınternettiń erkin jáne ashyq paıdalanýyna múddeli ekenin eskertkimiz keledi. Alaıda, ol basqa azamattardyń quqyqtary men bostandyqtaryna, halyqtyń ómiri men densaýlyǵyna qaýip tóndirmeýi tıis. Jalpy ortaq halyqaralyq normalarǵa sáıkes, ár memleket terrorıstik is-áreketke, onyń ıdeologııalyq negizin joıýǵa, terrorızm ıdeıalaryn kópshilikke taratý jáne nasıhattaý faktileriniń aldyn alý jónindegi jan-jaqty sharalar qabyldaýǵa mindetti. Osyǵan qaraı prokýratýra organdary ózge de múddeli organdarmen birlese otyryp, aldaǵy ýaqytta da azamattardyń qaýipsizdigine, ómirine, densaýlyǵyna, quqyqtary men bostandyqtaryna qaýip kelmeýi úshin barynsha atsalysady», - dedi N. Súıindikov.
