Bas prokýratýra EYU elderine ınternet-alaıaqtyqqa qarsy ortaq tetik usyndy
ASTANA. KAZINFORM — Búgin Túrkistanda Qazaqstan Respýblıkasynyń Bas prokýrory Berik Asylovtyń tóraǵalyǵymen Ekonomıkalyq yntymaqtastyq uıymyna múshe memleketterdiń bas prokýrorlarynyń 7-otyrysy ótti.
QR Bas prokýratýrasynyń habarlaýynsha, otyrysta resýrstardy, aqparatty jáne zamanaýı tehnologııalardy biriktirý arqyly ınternet-alaıaqtyqqa, tsıfrlyq jáne qarjylyq qylmysqa qarsy is-qımyldyń praktıkalyq sharalary talqylandy.
Jıynǵa Qazaqstan, Ázerbaıjan, Ózbekstan, Tájikstan, Qyrǵyzstan, Túrikmenstan, Iran, Túrkııa jáne Pákistan prokýratýralarynyń basshylary men ókilderi, sondaı-aq EYU Bas hatshysy jáne TMD-ǵa qatysýshy memleketterdiń Bas prokýrorlarynyń Úılestirý keńesiniń ókili qatysty.
Qazaqstan ınternet-alaıaqtyqtan azamattardy qorǵaýdyń kópdeńgeıli júıesin qalyptastyrý tájirıbesin usyndy.
Ol onlaın kredıtterdi rásimdeý kezinde bıometrııalyq sáıkestendirýdi, «nesıe alý týraly sheshimdi sanaly túrde qabyldaý úshin ýaqyt berý», nesıe alýdan erikti túrde bas tartý múmkindigin, baılanys operatorlarynyń antıfrod júıelerin jáne Ulttyq antıfrod ortalyǵyn qamtıdy.
Bul sharalar somasy 850 myń AQSh dollarynan asatyn 700-den astam alaıaqtyq kredıttiń berilýine jol bermeýge múmkindik berdi. 600-den astam dropper qylmystyq jaýapkershilikke tartyldy, al sottar negizsiz baıýdy óndirip alý týraly somasy 12 mln AQSh dollarynan asatyn talaptardy qanaǵattandyrdy.
— Qylmystyq qaýip-qaterlerdi boljaý ortalyǵynyń bazasynda ınternet-alaıaqtyq monıtorınginiń biryńǵaı taldaý platformasy jumys isteıdi. Ol quqyqtyq statıstıka, bank sektory, baılanys operatorlary, quqyq qorǵaý jáne memlekettik organdardyń derekterin biriktiredi.
Jasandy ıntellekt qylmyskerlerdiń ortaq tsıfrlyq jáne qarjylyq ınfraqurylymyn anyqtaýǵa, sondaı-aq alaıaqtyqtyń jańa shemalaryn boljaýǵa múmkindik beredi. Bul jekelegen epızodtardy tergeýden qylmystyq jelilerdi anyqtaýǵa jáne jańa qylmystardyń aldyn alýǵa kóshýge jol ashty, — delingen habarlamada.
Halyqaralyq ózara is-qımyl da naqty nátıjeler berýde. 2025-2026 jyldary Ýkraına, Armenııa jáne Belarýs áriptesterimen birge qońyraýlardy pysyqtaý nátıjesinde osy elderdegi uıymdasqan qylmystyq toptardyń joly anyqtalyp, 11 sheteldik koll-ortalyqtyń qyzmeti toqtatyldy. 45 uıymdastyrýshy ustaldy.
Qazaqstan halyqaralyq quqyqtyq kómek kórsetýdiń formaldy rásimderinen neǵurlym jedel ózara is-qımylǵa kóshýdi usyndy.
Osyǵan baılanysty EYU Hatshylyǵy janynan Uıymǵa qatysýshy memleketterdiń ortalyq organdarynyń ózara baılanysqa jaýapty tulǵalardyń tobyn qurý usynyldy. Bul qylmyskerler týraly aqparat almasýdy jedeldetýge, kúdikti operatsııalarǵa jedel den qoıýǵa jáne qajet bolǵan jaǵdaıda birlesken jedel-tergeý toptaryn qurýǵa múmkindik beredi.
Qazaqstan usynǵan tetikter otyrysqa qatysýshylar tarapynan qoldaý tapty. Taraptar ınternet-alaıaqtyq pen qarjylyq qylmysqa qarsy is-qımyl, tsıfrlyq krımınalıstıka, sondaı-aq jasandy ıntellekt pen taldaý tehnologııalaryn qoldaný salalarynda tájirıbe almasýdy jalǵastyrýǵa múddeli.
Eske salaıyq, buǵan deıin prokýratýra alaıaqtar jıi qoldanatyn tásilderdi ataǵan edi.
