Bas prokýratýra: Dıkıı Armandy ustaýǵa Reseı aralasqan emes

ASTANA. QazAqparat – QR Bas prokýrory Berik Asylov kúdikti Arman Jumageldıevti (laqap aty «Dıkıı Arman») ustaýǵa Reseı jaǵynyń qatystylyǵy týraly suraqqa jaýap berdi, dep habarlaıdy QazAqparat tilshisi.

Májilistiń jalpy otyrysynan keıin bolǵan baspasóz máslıhatynda tilshiler Bas prokýrordan kúdikti «Dıkıı Armannyń» málimdemesi jaıynda surady. Osyǵan deıin buqaralyq aqparat quraldarynda jarııalanǵan aqparatta «Dıkıı Arman» ózine qatysty iske Reseıdiń aralasqanyn alǵa tartqan.

Óz kezeginde Bas prokýror Berik Asylov bul aqparat shyndyqqa janaspaıtynyn aıtty.

«Bul ótirik aqparat. Bizde ondaı málimet joq», - dedi Bas prokýror.

Budan buryn habarlanǵandaı, búgin Berik Asylov Májiliste qańtar oqıǵasynda Dıkıı Arman qandaı qylmystar jasaǵanyn aıtyp berdi.

Ony qamaýda ustaý merzimi 2023 jyldyń 7 qańtaryna deıin uzartyldy.