Bas prokýratýra: Búlikshiler ótip bara jatqan adamdardy ózderine qosylýǵa májbúrlegen
«Sonymen birge búlikshiler beıbit turǵyndar men ótip bara jatqan adamdardy olarǵa qosylýǵa májbúrlegen. Mysaly, 5 qańtarda Almatyda qaraqshylar kóligin bermeı qoıǵany úshin belgili mýzykant, prodıýserdi atyp tastaǵan. Taksı, aýyr kólikter men avtobýs júrgizýshilerin de kóshelerde tosqaýyl qoıý arqyly jabýǵa májbúrlegen. Tipti dárigerlerge shabýyl jasap, 46 jedel járdem, 551 polıtsııa kóligin qıratqan, 5 órt sóndirý mashınasyn órtep jibergen.
Osy is-qımyldardyń barlyǵy, onyń ishinde ákimdikterdiń, Prezıdent rezıdentsııasynyń, UQK, polıtsııa jáne basqa da nysandar ǵımarattaryn qarýmen basyp alý úshin shabýyl jasaý zań júzinde lańkestik aktisi retinde tanylady. Olar halyq arasynda úreı men qorqynysh týdyrýdy, Úkimet pen basqarý organdarynyń qalypty jumysyn isten shyǵarýdy kózdegen. Beıbit sherýshiler eshqashan mundaı áreketke barmas edi»,- dedi Rızabek Ojarov Ortalyq kommýnıkatsııalar qyzmetindegi brıfıng barysynda.
Onyń atap ótýinshe, zańǵa baǵynatyn adamdar bul ýaqytta úıde otyrdy. Keıbir sanaly azamattar tutqynǵa túsken jáne jaralanǵan qyzmetkerler men áskerılerge kómek kórsetip, olarǵa tobyrlardyń tıisýine jol bermedi.
«Sonymen birge, tártipsizdikterdiń eń qyzý kezeńinde de tártip saqshylary ólimge ákeletin qarýdy qoldanbaǵanyn atap ótý qajet. Jaralanǵandardyń basym kópshiligi qaýipsizdik kúshteri arasynda bolýy da osydan. Aýrýhanaǵa túrli jaraqattarmen 3 393 qyzmetker jetkizildi. Olar bolsa, bireýdiń ákesi, kúıeýi, aǵasy nemese balasy. Olar jaı ǵana ózderiniń qyzmettik jáne áskerı mindetterin atqaryp, quqyqtyq tártip pen tynyshtyǵyn qamtamasyz etti», - dedi Bas prokýratýra ókili.
