Prokýrorlar bilim salasy boıynsha 8 mlrd teńge shyǵyndy anyqtady
ASTANA. KAZINFORM – Balabaqsha, mektep jáne kolledjderge júrgizilgen aýqymdy tekserý nátıjesinde 207 qylmystyq is qozǵaldy. Bul týraly elimizdiń Bas prokýratýrasy habarlaıdy.

Qazaqstan Respýblıkasynyń Bas prokýratýrasy mektepke deıingi, jalpy orta jáne arnaıy orta bilim berý mekemelerine jappaı tekserý júrgizip, onyń nátıjesinde 207 qylmystyq is qozǵady.
Bul týraly Bas prokýrordyń birinshi orynbasary Tımýr Táshimbaev málimdedi.
Onyń aıtýynsha, bıýdjet qarajatyn maqsatsyz paıdalaný jáne jymqyrý faktileri boıynsha anyqtalǵan shyǵyn kólemi 8 mlrd teńgeden asty, ıaǵnı birqatar zańbuzýshylyq anyqtaldy.
Tekserý barysynda sanıtarlyq normalardyń, órt qaýipsizdiginiń jáne mektepterdegi lańkestikke qarsy qorǵanys baǵytynda zań buzylǵany anyqtalǵan.
— Keıbir mektepte qaýipsizdikti qamtamasyz etý ornyna ashyq urlyq jasalǵany belgili boldy, — dep atap ótti Tımýr Táshimbaev.
Sonymen qatar, prokýratýra organdary balalardyń quqyǵyn qorǵaý máselelerin zerttegen.
— Biz 2 myńǵa jýyq ártúrli habarlama jınadyq, olardyń arasynda qupııa, Telegram-chat arqyly túsken shaǵymdar da bar. Bul jumys kóptegen másele men úrdisti anyqtaýǵa múmkindik berdi. Nátıjesinde 190-ǵa jýyq adam ákimshilik jaýapkershilikke tartyldy, al balalardyń paıdasyna 4,5 mlrd teńge alıment óndirildi, — dedi Tımýr Táshimbaev.
Odan bólek, tekserý barysynda qıyn jaǵdaıǵa tap bolǵan balalarǵa sapaly psıhologııalyq kómek kórsetý máselesi de qarastyryldy.
— Psıhologııalyq kómek berý júıesi álsiz ekeni anyqtaldy. Birinshiden, barlyq oqý ornynda shtattyq psıholog joq. Al bar bolǵan jaǵdaıda, olardyń jumysy fakýltatıvtik, qosymsha sıpatqa ıe. Biz psıhologtardyń resmı jumys saǵaty bolǵanyn qalaımyz. Psıhologtardyń róli tıisti deńgeıde baǵalanbaı otyr, sondyqtan bul baǵyttaǵy jumysty kúsheıtý qajet, — deıdi ol.
Onyń aıtýynsha, qazir quqyqbuzýshylyqtardyń aldyn alý týraly jańa zań ázirlenip jatyr, onda osy jáne basqa da mańyzdy máseleler qarastyrylady.
Aıta keteıik, qazaqstandyqtar jemqorlyq týraly habarlaǵany úshin 15,7 mln teńgege deıin syıaqy ala alady.