Bas prokýratýra barlyq áýejaılardyń mańyndaǵy jer telimderin tekseredi

NUR-SULTAN. QazAqparat – QR Bas prokýratýrasy Almaty mańyndaǵy ushaq qulaǵan ǵımarattardyń zańdylyǵyn tekseredi. Bul týraly Bas prokýrordyń orynbasary Marat Ahmetjanov aıtyp berdi, dep habarlaıdy QazAqparat tilshisi.

«Ókinishke qaraı, elimizde osyndaı oqıǵa oryn aldy. Prezıdenttiń tikeleı tapsyrmasy bar. Apat ornyndaǵy ǵımarattyń qanshalyqty zańdy nemese zańsyz salynǵanyn tekseremiz. Sonymen birge, Almaty áýejaıy ǵana emes, barlyq áýejaılar mańyndaǵy jer telimderiniń jeke menshikke qalaı berilgenin anyqtaımyz», - dep jaýap berdi Marat Ahmetjanov Ortalyq kommýnıkatsııalar qyzmetinde ótken brıfıngte tilshi saýalyna.

Aıta keteıik, 27 jeltoqsanda Almatydan Nur-Sultan qalasyna ushyp shyqqan ushaq radardan joǵalyp ketti.

Keıin 93 jolaýshysy jáne 5 ekıpaj múshesi bar ushaqtyń apatqa ushyraǵany málim boldy. Oqıǵanyń mán-jaıyn anyqtaý úshin ushaq qulaǵan aýmaqqa arnaıy komıssııa ushyp shyqty. Osy apatqa qatysty shuǵyl jeli iske qosylǵan.

QR Prezıdenti Qasym-Jomart Toqaev ushaq apatyna kináliler zańǵa sáıkes qatań jazalanatynyn málimdedi. Elbasy Nursultan Nazarbaev jolaýshylar ushaǵynyń apatqa ushyraýyna baılanysty kóńil aıtty.