Bas prokýratýra Aıbyn Janteleevke qatysty Ulttyq qaýipsizdik komıteti ókilderiniń áreketin zańsyz dep tapty
ASTANA. Jeltoqsannyń 3-i. QazAqparat /Aıdar Ospanálıev/ - Bas prokýratýra ekonomıkalyq qylmysqa jáne sybaılas jemqorlyqqa qarsy kúres agenttiginiń Almaty qalalyq departamenti bastyǵynyń orynbasary Aıbyn Janteleevke qatysty Ulttyq qaýipsizdik komıteti ókilderiniń áreketin zańsyz dep tapty.
Bul týraly búgin TMD-ǵa múshe memleketterdiń Bas prokýrorlarynyń Úılestirý keńesiniń 18-shi májilisi barysynda jýrnalıstermen suhbattasqan QR Bas prokýrory Qaırat Mámı málim etti, dep habarlaıdy QazAqparat.
Bas prokýrordyń sózine qaraǵanda, onyń buıryǵymen qurylǵan arnaıy tergeý toby óziniń jumysyn aıaqtady. «Keshe tergeý tobynyń músheleri bul oqıǵa jóninde aqparat quraldary úshin arnaıy suhbattar berdi. Qarjy polıtsııasynyń qyzmetkeri Aıdyn Janteleevke qatysty esirtki paıdalandy degen aıyppen Ulttyq qaýipsizdik komıtetiniń ókilderi qozǵaǵan qylmystyq is toqtatyldy. Ulttyq qaýipsizdik komıtetiniń ókilderi isti júrgizý barysynda dóreki túrde zań buzýshylyqtarǵa jol bergen. Bul áreketti quqyq qorǵaý organy qyzmetkerlerine qarsylyq kórsetý dep baǵalaýǵa bolmaıdy. Bul Ulttyq qaýipsizdik komıteti qyzmetkerleri tarapynan jiberilgen kemshilik qana», dedi Bas prokýror.
Onyń aıtýynsha, Ulttyq qaýipsizdik komıtetiniń qyzmetkerlerine qatysty osy isti júrgizý barysynda jiberilgen kemshilikteri úshin qylmystyq is qozǵalyp, Bas áskerı basqarmaǵa tekserýge jiberildi.
