Bas prokýratýra: Arnaıy prokýror 7 jasar bala isin óndiriske aldy
«Bas prokýror Ońtústik Qazaqstan oblysynyń kámeletke tolmaǵan turǵynyna qatysty zorlyq jasaý aryzy boıynsha sotqa deıingi tergeý amaldaryn arnaıy prokýrordyń óndirisine alýdy tapsyrdy. Qylmystyq is júrgizý kodeksine sáıkes oryn alǵan jaıttyń mán-jaıyn anyqtaý jáne kámeletke tolmaǵandardyń zańmen qorǵalatyn quqyqtaryn saqtaý úshin qajetti barlyq shara qabyldanýda. Keshendi sot-medıtsınalyq saraptama jasaýǵa protseske qatysýshylardyń barlyǵynyń ótinishin eskere otyryp, bilikti mamandar tartylatyn bolady», - delingen taratylǵan aqparatta.
Vedomstvo málimetinshe, qylmystyq istiń tergelý barysy elimizdiń Bas prokýrorynyń baqylaýynda tur.
«Іs fıgýranttary kámeletke tolmaǵandar ekendigin qaperge ala otyryp, Qylmystyq is júrgizý kodeksiniń 532-babyna sáıkes kámeletke tolmaǵandardyń qupııalylyq quqyǵyn saqtaý qajettigin túsindiremiz. Jarııa sóz sóıleýlerde jeke ómirge qatysty málimetterdi taratý jáne buqaralyq aqparat quraldarynda paıdalaný Qylmystyq kodekstiń 147-baby boıynsha qylmystyq jaýapkershilikke tartýǵa ákep soqtyrady. Tergeý nátıjeleri týraly aqparat kámeletke tolmaǵandardyń quqyqtary men zańdy múddelerin buzbaı, ruqsat etilgen kólemde jetkiziletin bolady», - dep atap ótedi Bas prokýratýranyń baspasóz qyzmeti.
Eske salaıyq, Saryaǵash aýdany Abaı aýylynda turatyn 7 jasar balanyń zorlanǵany týraly aqparat qoǵamda qyzý pikirtalas týǵyzdy. Balanyń ájesi quqyq qorǵaý organdaryna nemeresin joǵary synyp oqýshylary zorlap kelgenin aıtyp, aryzdanǵan. Qylmystyq is qozǵaldy.
Qazir bala Astanada. Keshendi ári tolyqqandy saraptama júrgizilgennen keıin tıisti sharalar qoldanylatyn bolady.
Aıta ketý kerek, daýly jaǵdaıdan soń OQO ákimi Janseıit Túımebaev birqatar sheneýnikke sógis jarııalap, jumystarynan shettetti. Abaı men Saryaǵash eldi mekenderinde polıtsııa qyzmetkerleri ornynan ketti.
