Bas prokýratýra arandatýshylyq úndeýlerge boı bermeýge shaqyrdy
Qazaqstan Respýblıkasy Bas Prokýrorynyń orynbasary B.B. Dembaevtyń «Prokýratýra týraly» Zańnyń 31-baby tártibinde úndeýi
«Áleýmettik jelilerde sotpen ekstremıstik dep tanylǵan «Qazaqstannyń demokratııalyq tańdaýy» uıymy (QDT) men onyń jaqtastary 2019 jylǵy 26 qazanda kezekti zańsyz aktsııalardy uıymdastyryp, qatysýǵa shaqyrýlar taratýda.
Atalǵan uıymnyń músheleri asa aýyr qylmystar jasaǵany úshin shetelde sot tóreliginen jasyrynyp júr.
Olar turǵyndardy quqyqqa qarsy is-áreketterge aıdap salyp, adamdardyń qaýipsizdigine, olardyń ómiri men densaýlyǵyna, múlkine zalal keltirý, qoǵamnyń qalypty tirshilik áreketin buzý qaýpin týyndatýda.
Bul tulǵalardyń qoǵamdyq qaýipsizdik pen qoǵamdyq tártipke qater tóndiretin is-áreketterine jol berilmeıdi jáne olar shekteýge jatady. Óıtkeni Konstıtýtsııanyń normalaryna jáne eldiń zańdaryna, Azamattyq jáne saıası quqyqtar týraly halyqaralyq paktiniń 19, 20, 21-baptaryna qaıshy keledi.
«Ekstremızmge qarsy is-qımyl týraly» Zańnyń 13-babyna sáıkes ekstremıstik uıymdardy tarta otyryp, beıbit jınalystar, mıtıngiler, sherýler, pıketter jáne demonstratsııalar ótkizýge, olardyń aıyrym belgilerin paıdalanýǵa, ekstremıstik materıaldardy taratýǵa jol berilmeıdi.
Osyǵan baılanysty, memlekettik organdar sotpen tyıym salynǵan ekstremıstik uıym bastamashylyq etýdegi ruqsat etilmegen narazylyq aktsııalarynyń uıymdastyrýshylary men qatysýshylaryna zańmen belgilengen tártipte qatań sharalar qoldanatyn bolady.
Zańsyz aktsııalarǵa qatysý faktileri rastalǵan jaǵdaıda quqyq buzýshylarǵa qatysty Qazaqstan Respýblıkasy Ákimshilik quqyq buzýshylyqtar týraly kodeksiniń 488-baby boıynsha jaýapkershilik máselesi qoıylatyn bolady (50 AEK-ke deıin aıyppul, 15 táýlikke deıin qamaqqa alý).
Eger osy is-áreketter azamattardyń, uıymdardyń, qoǵamnyń nemese memlekettiń quqyqtary men zańdy múddelerine eleýli zııan keltirse, ol qylmystyq jaýaptylyqqa ákep soǵady (Qylmystyq kodekstiń 400-baby – ruqsat etilmegen aktsııalardy uıymdastyrý jáne qatysý, eger bul is-áreketter eleýli zııan keltirse).
Bas prokýratýra quqyq buzýshylyqtyń aldyn alý, adamnyń quqyqtary men bostandyqtaryn qorǵaý maqsatynda azamattardy arandatýshylyq shaqyrýlarǵa berilmeýge jáne ekstremıstik uıymdardyń zańsyz aktsııalaryna qatysýdan bas tartýǵa shaqyrady», - delingen B.Dembaevtyń «Prokýratýra týraly» Zańnyń 31-baby tártibinde jarııalanǵan úndeýinde.