Bas prokýratýra amerıkalyq kompanııanyń zańsyz áreketteri týraly aıtty

ASTANA. QazAqparat - QR Bas prokýrorynyń orynbasary Andreı Lýkın Qazaqstandaǵy elektr energııasyn óndiretin kompanııalardyń keıbir zańsyz áreketteri týraly aıtty, dep habarlaıdy QazAqparat tilshisi.

«6 jyl boıy 2015 jylǵa deıin «Investıtsııaǵa tarıfti aýystyrý» baǵdarlamasy kúshinde bolǵan edi. Onyń máni - memleket joǵary tarıfti bekitedi de, monopolıster óndiriske ınvestıtsııa salýǵa mindetteledi. Osydan kelip baǵa eki esege ósip ketken. Tutynýshylardyń 1 trln teńgege jýyq qarajaty ınvestıtsııalanǵanymen, tıimdilik monıtorıngin eshkim júrgizbegen. Onyń ústine jumys istep turǵan qýatty quraldardyń eskirýi joǵary deńgeıde qalyp, onyń kórsetkishi 54 paıyzdan asyp ketken», - deıdi Andreı Lýkın Bas prokýratýrada ótken kollegııa otyrysynda.

Onyń aıtýynsha, qýatty quraldardyń jeke stantsııalarda tozýy tómendegenimen, elimizdiń 30 paıyzyn baqylaýynda ustaıtyn «Samuryq-Energo» AQ-ta bul kórsetkish joǵarylaı bergen.

«2016 jyldan bastap energııa óndiretin uıymdardyń ıeleri ınvestmindettemelerden bosatyldy - bul álbette, baǵalardyń tómendeýine ákelýi kerek edi. Alaıda Energetıka mınıstrligi shyǵyndarǵa taldaý jasap, oıǵa qonymdy tarıfterdi engizýdiń ornyna tarıfterdiń deńgeıin sol kúıi qaldyra salǵan», - deıdi spıker.

Bas prokýrordyń orynbasarynyń aıtýynsha, keıbir sýbektter ózgelerdiń kóp shyǵynynyń arqasynda negizsiz kiristerge qol jetkizip otyrǵan.

«Máselen, Jańajol GTES-te 1 kılovatt-saǵattyń ózindik quny 5 teńge bolsa, Oral gazqubyrly eletrostantsııada bul baǵa eki ese qymbat bolǵan. Aqyry, bul topta shekti tarıf 12 teńge bolyp bekitilgen. Osy áreket aqyrynda 15 kásiporynǵa halyqtyń arqasynda kiristen tys 38 mlrd teńge tabýǵa sep bolǵan. Tek ShQO-daǵy úsh energostantsııasy bar amerıkalyq bir ǵana AES kompanııasy shekaradan 22 mlrd teńgeniń úlespaıdasyn (dıvıdendin) shyǵarǵan», - deıdi Andreı Lýkın.