Bas prokýratýra Almatyda balalardyń S gepatıtin juqtyrý máselesine baılanysty tıisti organnan qosymsha aqparat talap etip otyr

Bul týraly búgin jýrnalıstermen bolǵan brıfıngte Bas prokýratýranyń resmı ókili Nurdáýlet Súıindikov málim etti, dep habarlaıdy QazAqparat.

Onyń aıtýynsha, Bas prokýratýra atalmysh másele boıynsha tekserý jumystaryn jalǵastyrýda. «Ókinishke oraı, Densaýlyq saqtaý mınıstrligi osy ýaqytqa deıin tıisti quqyqtyq turǵydan qorytyndy baǵa berýge qajetti materıaldardy bermeı otyr. Biz tekserý jumystarynyń barysynda qosymsha materıaldar suratqan bolatynbyz. Onyń ishinde Densaýlyq saqtaý mınıstrliginiń balalardyń S gepatıtin tis aýrýlary emhanasynda juqtyryp alýy múmkindigi jónindegi qorytyndylaryn rastaıtyn materıaldardy da suratyp otyrmyz. Biz quqyqtyq baǵa berýge jetkilikti materıaldar tolyq jınalǵannan keıin ǵana naqty sheshim shyǵara alamyz», dedi resmı ókil.

Onyń aıtýynsha, Bas prokýratýra qalyptasqan jaǵdaıdy tekserý jumystarynyń barysynda Densaýlyq saqtaý mınıstrligi bergen materıaldardy ǵana emes, sonymen qatar jábirlenýshi taraptyń ustanymdary men sońǵy ýaqytta buqaralyq aqparat quraldarynda jarııalanǵan habarlardy da nazarǵa alady.