Bas prokýratýra: Almaty qalasynda belgisiz er adamnyń jáshikke bıýlletenderdi jappaı tastaý faktisi anyqtaldy

Bul týraly búgin ótken brıfıngte Bas prokýratýranyń resmı ókili Nurdáýlet Súıindikov málim etti.

«Saılaý kúninde túrli aqparat kózderinde daýys berý jáshikterine bıýlletenderdi jappaı tastaý týraly habarlama boldy. Qazirgi kezde anyqtalǵanyndaı, bul áreketter arandatýshylyq sıpatqa ıe. Mysaly, Almaty qalasynyń Áýezov aýdanyndaǵy № 426-nshy saılaý ýchaskesinde belgisiz er adam jáshikke bıýlletenderdi jappaı tastaǵan. Ol ustaý kezinde jasyrynyp úlgerdi. Alaıda, baıqaýshylardyń qatysýymen jáshikti ashqan kezde qastyq jasaýshy bıýlletender emes, bıýlletenderge uqsas ózi jasaǵan tústi qaǵazdardyń paraqtaryn tastaǵandyǵy anyqtaldy»,-dedi resmı ókil.

Onyń sózine qaraǵanda, quqyqbuzýshy keıinnen óz erkimen Áýezov aýdanynyń prokýratýrasyna kelip, áreketin komıssııa músheleri men baıqaýshylardyń jitiligin tekserý maqsatymen jasaǵandyǵyn túsindirdi.